एजेन्सी – इंग्ल्यान्डका विकेटकिपर ब्याट्सम्यान जस बटलरले गतवर्ष भएको एकदिवसिय विश्वकप फाइनलमा लगाएको जर्सी मोटो रकममा लिलामी भएको छ ।

विश्वभर महामरीको रुप लिएको कोरोना भारइस विरुद्ध सहयोगको लागि बटलरले आफुले विश्वकप जित्दा न्युजिल्यान्डविरुद्ध फाइनलमा लगाएको जर्सी नै सार्वजनिक लिलामीमा राखेका थिए । मंगलबार सम्मको म्याद रहेको उक्त लिलामीमा ८२ जनाको बोली लाग्दै ६५ हजार १ सय पाउण्डमा (झन्डै ९८ लाख नेपाली रुपैयाँ) बिक्री भएको हो । उक्त जर्सीमा इंग्ल्यान्डले विश्वकप जित्दा टोलीमा रहेका सबै खेलाडी र प्रशिक्षकको हस्ताक्षर रहेको छ ।

२०१९ जुलाईमा भएको एकदिवसिय फाइनलमा न्युजिल्यान्डलाई सुपर ओभरमा समेत स्कोर बराबर हुँदा बाउन्ड्री गन्तिको आधारमा हराउँदै घरेलु टोली इंग्ल्यान्डले पहिलो पटक उपाधि जितेको थियो । विश्वकप फाइनलमा बटलरले ६० बलमा ६ चौका सहित महत्त्वपूर्ण ५९ रन बनाउनुको साथै सुपर ओभरमा ३ बलमा ७ रन जोडेका थिए ।

न्युजिल्यान्डलाई जितको लागि सुपर ओभरको अन्तिम बलमा दुई रन चाहिएको अवस्थामा विकेटकिपर बटलरले जोसन रोयको थ्रो बलमा मार्टिन गुप्टिललाई उत्कृष्ट रन आउट गराउँदै पहिलो पटक एक दिवसिय विश्वकप उपाधि पक्का गरेका थिए ।

बटलरले उक्त रकम च्यारिटीमार्फत रोयल ब्राम्प्टन र हेयरफिल्ड अस्पताललाई सहयोग गर्ने छन् । कोरोना भाइरसको कारण विश्वमा हालसम्म १४ लाख ४१ हजार भन्दा बढी संक्रमित भएका छन् भने ८२ हजार ९ सय ९२ जनाको मृत्यु भई सकेको छ ।