एजेन्सी – भारतीय क्रिकेट टोलीका ओपनर तथा इन्डियन प्रिमियर लिग (आइपिएल) मा मुम्बई इन्डियन्सका कप्तान रोहित शर्माले आफ्नो करिअरको उत्कृष्ट प्रशिक्षक अष्ट्रेलियाका पुर्व कप्तान रिकी पोन्टिङ रहेको बताएका छन् ।

इंग्ल्यान्डका पूर्व खेलाडी केभिन पिटरसनसँग सामाजिक सञ्जाल इन्स्टाग्राममा कुराकानीको क्रममा रोहितले अष्ट्रेलियाका पुर्व कप्तान पोन्टिङलाई आफ्नो करिअरको उत्कृष्ट प्रशिक्षक बताएका हुन् । सन् २०१३ मा पोन्टिङले खेलाडी रहँदै गर्दा मुम्बई इन्डियन्सको कप्तानी बीचमा छोड्दै रोहितलाई कप्तानमा नियुक्त गरेका थिए । रोहितले पहिलो कप्तानीमै फाइनलमा चेन्नई सुपर किंग्सलाई २३ रनले हराउँदै मुम्बईलाई पहिलो उपाधि दिलाए ।

‘कुनै एक प्रशिक्षकको नाम बताउन मुश्किल छ । तर म सबैभन्दा बढी प्रभावित रिकी पोन्टिङबाट भए । जसरी उनले २०१३ आइपिएल बीच सिजनै कप्तानी छोडेर मलाई जिम्मेवारी दिए । त्यसपछि उनले एक प्रशिक्षकको रुपमा सबैकुरा सानदार तरिकाले सम्हाले र सिकाए’, रोहितले भने ।

‘कप्तानी छोडेपछि पोन्टिङ सपोर्ट स्टाफको रुपमा मुम्बई इन्डियन्ससँग जोडिरहे । जसको दौरानमा उनले युवा खेलाडीलाई सानदार तरिकाले मार्गदर्शन गरेका थिए । मलैले पनि उनीसँग धेरै कुरा सिक्न पाएँ । उनीसँग अरुभन्दा निकै फरक खेल योजना हुन्छ’, रोहितले भने ।

रोहितको कप्तानीमा मुम्बईले ४ पटक (२०१३, २०१५, २०१७ र २०१९) मा आइपिएल उपाधि जिती सकेको छ । पोन्टिङ २०१४ देखी १६ सम्म मुम्बईको प्रशिक्षक थिए । सन् २०१८ देखि पोन्टिङले दिल्ली क्यापिटल्सको प्रशिक्षक समालि रहेका छन् । अन्तर्राष्ट्रिय क्रिकेटमा पोन्टिङ सर्वाधिक सफल कप्तान मानिन्छन् । नेपाली स्पिनर सन्दीप लामिछानेले आईपिएलमा अवसर पाउनुलाई पनि माइकल क्लार्क र पोन्टिङको सुमधुर सम्बन्धसँग जोडिन्छ ।