एजेन्सी – स्टिभ स्मिथले पुनः अष्ट्रेलियन क्रिकेट टोलीलाई नेतृत्व गरेमा आफुले त्यसमा पूर्ण रुपमा समर्थन गर्ने टेष्ट टोलीका कप्तान टिम पेइनले बताएका छन् । दक्षिण अफ्रिकाविरुद्धको टेष्टमा बल टेम्परिङको अभियोगमा पूर्व कप्तान स्थिममाथि सन् २०१८ को मार्चमा प्रतिबन्ध लगाएपछि ३५ वर्षे पेइनेले नेतृत्व लिएका थिए ।

३० वर्षे स्थिम पछिल्लो पटक इग्ल्यान्डविरुद्धको एसेज सिरिजमार्फत अन्तर्राष्ट्रिय क्रिकेटमा फर्केका थिए । राष्ट्रिय टोलीलाई नेतृत्व गर्न नपाउने स्थिममाथिको प्रतिबन्ध पनि हालै टुंगिएको छ । त्यसपछि स्थिमलाई पुनः कप्तान बनाउने विषयमा चर्चा सुरु भएको छ ।

‘आइपिएलमा उनी राजस्थान रोयल्सका र द हन्ड्रेडमा वेल्स फायरका कप्तान हुन् । उनी यसमा रमाइरहेका हुन्छन्,’ पेइनले भने, ‘यदि स्थिम पुन टोलीको नेतृत्व गर्त चाहन्छन् भने मेरो पूरा साथ रहनेछ । ‘ पेइनको कप्तानमा अष्ट्रेलियाले १० टेष्ट जितेको छ भने ६ वटामा हार र एउटामा बराबरी गरेको छ । जसमध्ये पछिल्ला दुई सिजनमा टोलीले पाकिस्तालाई २–० र न्यूजिल्यान्डलाई ३–० ले हराएको थियो ।

२०१४ देखि २०१८ सम्म स्मिथको कप्तानीमा अष्ट्रेलियाले ३६ टेष्ट खेलेको थियो । जसमा कीर्तिमानी १८ मा जित, १० मा हार र ६ मा बराबरी गरेको थियो । स्थिमले पुनरागमनपछि उच्च प्रदर्शन गरिरहेका छन् । उनले एसेज सिरिजमा ११०.५६ को औसतमा ७ सय ७४ रन बनाएका थिए । उनी प्लेयर अफ दी सिरिज समेत चुनिएका थिए ।