काठमाडौं (हाम्रो खेलकुद) – टियू अन्तर्राष्ट्रिय क्रिकेट मैदान कीर्तिपुरका ग्राउन्ड स्टाफ जयबहादुर तामाङ (सेते) दाईको निधन भएको छ । मृगौला रोगबाट पीडित ५३ वर्षे तामाङको वीर अस्पतालबाट ललितपुरको लेलेस्थित घर लैजाने क्रममा बाटोमै मृत्यु भएको श्रीमती निरमायाले जानकारी दिइन ।

डाक्टरहरुले निको हुन कठिन हुन्छ घर लैजान चाहनुहुन्छ भने लानुस भन्नुभएपछि घर लाने क्रममा राती ९ः०० बजे सुनकोठी पुग्दा मृत्यु भएको उनले बताइन । निर्मायाका अनुसार आजैबाट उनको अन्तिम संस्कार सुरु हुनेछ । झन्डै डेढ देशकदेखि नेपालको एक मात्र अन्तर्राष्ट्रिय क्रिकेट मैदानका ग्राउन्ड्सम्यान तामाङका दुवै मृगौला खराबी देखिएपछि फागुन २८ गते देखि वीर अस्पतालमा उपचार गराइरहेका थिए ।

अस्पतालले मिर्गौला खराबी सुरुवाती चरणमा रहेकोले काम गर्न सक्ने र त्यसो नभएको खण्डमा प्रत्यारोपण गर्नुपर्ने बताएपनि त्यसो हुन नसक्दै उनको निधन भएको हो । कमजोर आर्थिक अवस्थाका कारण उनको उपचारको लागि क्रिकेट प्लेयर्स एसोसिएसन अफ नेपाल (सिप्यान) र नेपाली क्रिकेट समर्थक समाज (एनसिएसएस) ले उनको उपचारर्थ सहयोग अभियान चलाउदै संकलित रकम उनको परविारलाई हस्तान्तरण गरेको थियो ।

सिप्यानले १ लाख ३३ हजार तथा एनसिएसएसले ५० हजार रुपैयाँ हस्तान्तरण गरिसकेको थियो । एनसिएसएसले बाँकी संकलित रहम छिट्टै हस्तान्तरण गर्ने तयारी गरेको थियो ।फागुन २३ गते राती टियू मैदानमा सुतिरहेको अवस्थामा राति १ बजे पिसाब रोकिएपछि उनलाई मैदानका अन्य कर्मचारीले राती नै सानेपास्थित स्टार अस्पताल र्पुयाएका थिए ।

तर, पछि पुनः समस्या दोहोरिएपछि उनीलाई वीरमा भर्ना गरिएको थियो । वीरमा पुगेपछि उनको दुवै मिर्गौला खराब रहेको थाहा भएको थियो । ललितपुरको लेलेमा जन्मिएका उनले २०६१ सालदेखि टियू क्रिकेट मैदानको हेरचाह गर्दै आएका थिए ।