काठमाडौं (हाम्रो खेलकुद)– राष्ट्रिय क्रिकेट टोलीका स्पिनर सन्दीप लामिछानेले कोरोना भाइरस कोभिड १९ राहत कोषमा १ लाख रुपैयाँ सहयोग गर्ने भएका छन् । सामाजिक सञ्जालमार्फज जानकारी दिँदै युवा स्पिनर सन्दीपले सरकारले स्थापना गरेको कोषमा सहयोग गर्ने घोषणा गरेका हुन् ।

उनले फेसबुकमा लेखेका छन्, ‘यो शारीरिक दूरी बनाउने समय हो । जसलाई सहयोग र ध्यान पुराउनु पर्ने त्यसलाई नबिर्सौं । सबैले सद्भाव बढाउँ र जिम्मेवारी वहन गर्दै मानवताको परिचय दिउँ । सबै जना सुरक्षित रहौं ।’

नेपालमा अहिले सम्म ३ जनामा कोरोना भाइरस पोजेटिभ पाइएको छ । जसमा १ जना उपचारपछि निको भएर घर फर्किसकेको र २ जना टेकु अस्पतालमा उपचार गरिरहेको बताइएको छ । सरकारले कोरोना भाइरसको संक्रमण फैलन नपाओस् भन्नका लागि चैत ११ देखि १८ गते सम्म लकडाउनका घोषणा गरेको छ ।

आइपिएललगायत विश्वका चर्चित व्यवसायिक फ्रेन्चाइज लिग खेलिसकेको सन्दीपले केहि साता अघि चितवनमा निर्माण भइरहेको गौतम बुद्ध अन्तर्राष्ट्रिय रंगशालाका लागि पनि सहयोग गरेका थिए ।

कीर्तिपुरमा अमेरिका र ओमानविरुद्धको सिरिजमा लिएको हरेक विकेट बराबर उनले ८ हजार ८ सय ४८ रुपैयाँ उपलब्ध गराएका थिए उनले सिरिजमा ८ विकेट लिएका थिए । त्यहि सिरिजमा उनले खेल जीवनको उत्कृष्ट प्रदर्शन गर्ने क्रममा अमेरिकाविरुद्ध एकै खेलमा ६ विकेट लिएका थिए । उक्त प्रदर्शन नेपालको ओडीआई किर्तिमान प्रदर्शन पनि हो ।

कोराना भाइरसको सक्रमणले विश्वव्यापी रुपमा महामारीको रुप लिएपछि राष्ट्रिय तथा अन्तर्राष्ट्रिय सबै क्रिकेट प्रतियोगिता स्थगित छन् । सन्दीप चैत १ गते देखि कीर्तिमपुरमा आयोजना हुने एभरेष्ट प्रिमियर लिग (इपिएल) र त्यसपछि आइपिएल खेल्ने तयारीमा थिए ।