काठमाडौं (हाम्रो खेलकुद)– धुर्मुस सुन्तली फाउन्डेसनको पहलमा चितवन भरपुरको शान्तिपुरमा निर्माण भइरहेको गौतम बुद्ध अन्तर्राष्ट्रिय रंगशालाको काम तत्कालका लागि स्थगित भएको छ ।

विश्व भर भैलिरहेको कोरोना भाइरस र त्यसको संक्रमणबाट जोगिनका लागि सरकारले गरेको निर्णयलाई मध्यनगर गर्दै निर्माण कार्य तत्कालका लागि रोक्ने फाउन्डेसनका अध्यक्ष सिताराम कट्टेल (धुर्मुस) ले घोषणा गरेका छन् ।

सामाजिक सञ्जालमा भिडियोमार्फत सन्देश दिने क्रममा माहौल सहज नहुँदा सम्मका लागि निर्माण कार्यल स्थगित गर्ने बताएका हुन् । रंगशालाको मैदानको काम झन्डै ८० प्रतिशत सम्पन्न भइसकेको उल्लेख गर्दै कट्टेलले भने, ‘डे«नको सम्पूर्ण काम सकिएको छ । यो साताबाट पिलरको लागि डन्डीको काम गरिरहेका थियौं । तर यो विश्वमै परेको असरका कारण काम रोक्ने पर्ने अवस्था बनेको छ ।’

रंगशालामा निर्माणमा दैनिक २ सय ७० जना भन्दा काममा खटिएको र आउने साताबाट त्यति नै जनशक्ति थप्ने योजना रहेपनि अब तत्कालका लागि भने स्थगित गरेको कट्टेलले जनाए । अवस्था सहज हुने वित्तिकै पुनः निर्माणको कार्य सुरु हुने पनि उनले जनाएका छन् ।

गत वर्ष भरतपुर नगरपालिकासँग जग्गा सम्झौतामा लिएपछि रंगशालाको निर्माण काम अघि बढेको हो । रंगशाला निर्माणका लागि झन्डै ३ अर्ब रुपैयाँ खर्च हुने अनुमान गरिएको छ ।

कट्टेलले कोराना भाइरसको सक्रमणबाट जोगिनका लागि सरकार र सम्बन्धित विषयका विज्ञहरुको सन्देशलाई पालना गर्न आग्रह गर्दै अनावश्यक हल्लाको पछाडि नलाग्न पनि सुझाव दिएका छन् ।