एजेन्सी – चीनको वुहान शहरबाट फैलिएको कोरोना भाइरस (कोभिड–१९ ) को कारण यति बेला विश्वभर महामारी फैलिनुको साथै त्रास उत्पन्न भएको छ ।

कोरोना भाइरसको कारण विश्व खेलकुदलाई पनि ठुलो असर पुर्याएको छ । क्रिकेट पनि कोरोनाको कारण नराम्रोसँग प्रभावित बनेको छ । मुखैमा आएका प्रतियोगिता र सिरिज स्थगित हुनुको साथै सारिएका छन् । नेपालको फ्रेन्चाइज टि२० लिग एभरेष्ट प्रिमियर लिग (इपिएल) देखी विश्व चर्चित इन्डियन प्रिमियर लिग (आइपिएल) सम्म कोरोनाको मारमा परेका छन् । पाकिस्तान सुपर लिग (पिएसएल) भने जारी छ । तर पिएसएलबाट विदेशी खेलाडी स्वदेश फर्किन थालेका छन् ।

न्युजिल्यान्डका तीब्र गतिका बलर ल्योकी फर्गुसन र अष्टे«लियाका केन रिचर्डसनलाई कोरोनाको आशंका गरेपनि दुबैको रिपोर्ट नेगेटिभ आएको छ । कोरोना भाइरसले गर्दा विश्व क्रिकेटमा हालसम्म प्रभावित सिरिज र प्रतियोगिता निम्न छन् ।

१. इपिएल

नेपालको सर्वाधिक लोकप्रिय फ्रेन्चाइज लिग इपिएल चैत्र १ देखी हुने तयारी थियो । तर कोरोना भाईरसको कारण आयोजकले अकस्मात अघिल्लो हप्ता एक पत्रकार सम्मेलन गरि अनिश्चित समयको लागि स्थगित भएको जानकारी दिएका थिए । यसपटक इपिएलमा वेस्ट इन्डिजका ओपनर क्रिस गेलदेखि न्युजिल्यान्डका अलराउन्डर कोरी एन्डरसनसम्मका स्टार खेलाडी आउने तयारी हुँदा विशेष हुने अनुमान गरिएको थियो ।

२. आइपिएल

विश्व क्रिकेटकै सर्वाधिक लोकप्रिय र सफल टि२० फ्रेन्चाइज लिग आइपिएल पनि कोरोना भाइरसको कारण झण्डै तीन हप्ता पछि सरेको छ । सुरुमा भारतीय क्रिकेट कन्ट्रोल बोर्ड (बिसिसिआई) का अध्यक्ष सौरभ गांगुलीले नसर्ने भनेपनि अन्तिममा चौतर्फी आलोचनापछि सरेको हो । आइपिएल चैत्र १६ देखि सुरु हुने तयारीमा थियो । तर अब वैशाख ३ देखि सुरु हुने छ ।

३. लेजेन्ड्स वर्ल्ड सिरिज

भारतका मुम्बईमा पाँच राष्ट्र (भारत, श्रीलंका, अष्टेलिया, दक्षिण अफ्रिका र वेस्टइन्डिज) लेजेन्ड्सबीचको वर्ल्ड रोड फेफ्टीको सिरिज पनि स्थगित भएको छ । भारतका पुर्व कप्तान सचिन तेन्दुलकर देखी वेस्ट इन्डिजका पुर्व कप्तान ब्रायन लाराले सहभागिता जनाएको उक्त प्रतियोगिता सुरुवाती ४ खेल सम्पन्न हुँदा अन्य रद्ध भए ।

४. भारत र दक्षिण अफ्रिकाबीच सिरिज

कोरोना भाइरसको कारण भारत र दक्षिण अफ्रिकाबीचको तीन ओडीआई सिरिज अन्तर्गत बाँकी दुई खेल रद्ध भएको छ । पहिलो खेल बर्षाको कारण हुन नसक्दा बाँकी दुई खेल रद्ध भएका छन् ।

५. श्रीलंका र इंग्ल्यान्डबीच टेष्ट सिरिज

मार्च पहिलो सातानै श्रीलंका पुगेको इंग्ल्यान्डले दोस्रो अभ्यासको क्रममा टेष्ट सिरिज सुरु नभई स्थगित भएको छ । दुई टेष्ट सिरिजको लागि श्रीलंका पुगेको इंग्ल्यान्ड पहिलो टेष्ट बिहीबार देखी खेल्ने कार्यतालिका थियो ।

६. न्युजिल्यान्ड र अष्टेलियाबीचको सिरिज

पहिलो एक दिवसिय खेलमा पाहुना टोली न्युजिल्यान्ड अष्टेलियासँग ७१ रनले पराजित भएको थियो । सिड्नीमा प्रतिस्पर्धा भएको उक्त खेल खाली स्टेडियममा गराईएको थियो । ब्याट्सम्यानले प्रहार छक्का प्याराफिटमा खेलाडीनै लिन जानु परेको थियो । पहिलो खेल भएपनि कोरोना जोखिम झनैबढेपछि बाँकी दुई खेल स्थगित थयो । त्यस्तै तीन टि२० सिरिज पनि स्थगित भएको छ ।

७. विश्वकप लिग२ को छैटौं चरण

अमेरिकामा अप्रिल १ देखी ८ सम्म हुन लागेको आईसीसी विश्वकप लिग २ अन्तर्गत अमेरिका, युएई र स्टकल्यान्डबीचको त्रिकोणात्मक सिरिज पनि स्थगित भएको छ ।

८. विश्वकप च्यालेन्ज लिग ‘ए’

सोमबार देखी मलेसियामा सुरु हुन लागेको विश्वकप च्यालेन्जेज लिग ‘ए’ कोरोना भाइरसको कारण स्थगित हुने पहिलो क्रिकेट प्रतियोगिता थियो । क्यानडा, डेनमार्क, मलेसिया, सिंगापुर र भानुआतुबीच हुन लागेको उक्त प्रतियोगिताको विजेताले सन् २०२२ मा हुने एक दिवसिय विश्वकप क्वालिफायर ग्लोबल छनोटमा स्थान बनाउने छ ।