काठमाडौं (हाम्रो खेलकुद) – सोनु तामाङ र सुमन उदयको अलराउन्ड प्रर्दशनमा काठमाडौं जिल्ला सिनियर छनोट पुरुष क्रिकेट प्रतियोगिता उपाधि बालुवाटार क्रिकेट क्लब तथा टे«निङ सेन्टरले जितेको छ ।

मुलपानी क्रिकेट मैदानमा बिहीबार भएको फाइनलमा महावीर क्लबलाई ६ विकेटले पराजित गर्दै बालुवाटारले उपाधि जितेको हो । १ सय ५९ रनको विजयी लक्ष्य पछ्याएको बालुवाटारले ३८.४ ओभरमा ४ विकेटको क्षतिमा पुरा गर्यो ।

बालुवाटारको जितमा सोनु तामाङ ५८ बलमा ६ चौका र २ छक्का सहित ५२ रनमा अविजित रहे । ओपनर सुमन उदय ८२ बलमा ७ चौका सहित ५० रनमा रिटायर्ड हर्ट भएका थिए ।

सञ्जय श्रेष्ठ र सुवास खकुरेल दुवैले खाता खोल्न सकेनन् । अभिनाष सिंह ११, प्रविण जोशी २२ र अभिनाष बस्यालले ९ रन बनाए । महावीरका चन्द्र बहादुर बुढा, ज्योती भण्डारी, दीपेन्द्र मैनाली र जितेन्द्रसिंह ठकुरीले समान १ विकेट लिए ।

त्यसअघि टस हारेर ब्याटिङको निम्तो पाएको महावीर क्लब ४६.१ ओभरमा १ सय ५८ रनमा अल आउट भयो । महावीरका बिभत्सु थापाले १ सय ४९ बलमा ६ चौका र १ छक्का ६७ रनको योगदान दिए । रबिन जोशी २१, दीपेन्द्र मैनाली २३ र रञ्जम रेग्मीले १५ रन जोडे ।

बालुवाटारका सोनु तामाङले ८.१ ओभरमा १ मेडन सहित ३५ रन खर्चेर ४ विकेट लिए । सुमन उदयले ३ विकेट लिए । काठमाडौं जिल्ला छनोट प्रतियोगितामा एकेडेमी र क्लब गरि कुल १२ टोलीको सहभागिता थियो ।