एजेन्सी – कप्तान जोन्टी रोड्स र अल्बी मोर्केलको उत्कृष्ट ब्याटिङमा दक्षिण अफ्रिका लेजेन्ड्सले वेस्टइन्डिज लेजेन्डसलाई ६ विकेटले पराजित गर्दै लेजेन्ड्स वर्ल्ड सिरिजमा विजयी सुरुवात गरेको छ ।

जितका लागि १ सय ४४ रनको विजयी लक्ष्य पछ्याएको दक्षिण अफ्रिका लेजेन्ड्सले १८.३ ओभरमा ४ विकेट लक्ष्य गुमाउँदै पुरा गर्यो । दक्षिण अफ्रिका लेजेन्ड्सको जितमा कप्तान जोन्टी रोड्स ४० बलमा ६ चौका र १ छक्का सहित ५३ रनमा अविजित रहे । त्यस्तै एल्बी मोर्केल ३० बलमा ६ चौका र २ छक्का सहित ५४ रनमा अविजित रहँदै सहज जित पक्का गराए ।

खराब सुरुवात गरेको दक्षिण अफ्रिकालाई जोन्टी रोड्स र एल्बी मोर्केलले पाँचौ विकेटका लागि १ सय ४ रनको शतकीय अविजित साझेदारी गर्दै जित पक्का गरे । वेस्ट इन्डिजका टिनो बेस्टले २ विकेट लिए ।

त्यसअघि मुम्बईमा टस हारेर ब्याटिङको निम्तो पाएको वेस्ट इन्डिजले निर्धारित २० ओभरमा ८ विकेट गुमाउँदै १ सय ४३ रन बनाएको थियो । वेस्ट इन्डिजका ओपनर डारेन गंगाले ३२ बलमा ५ चौका सहित ३१ रनको योगदान दिए । रिकार्डो पावेलले ३०, शिवनाराण चन्द्रपल २१ र कार्ल हुपरले २३ रन जोडे । दक्षिण अफ्रिका पल हरिसले ४ ओभरमा २१ रन खर्चेर ३ विकेट लिए । एल्बी मोर्केलको नाममा २ विकेट रह्यो ।

दक्षिण अफ्रिकाले दोस्रो खेलमा शुक्रबार श्रीलंका लेजेन्ड्ससँग प्रतिस्पर्धा गर्ने छ । प्रतियोगितामा भारत र अष्ट्रेलिया पनि सहभागि छन् ।