काठमाडौं (हाम्रो खेलकुद) – महावीर क्लब र बालुवाटार क्रिकेट क्लब मुलपानीमा जारी काठमाडौं जिल्ला सिनियर छनोट क्रिकेट प्रतियोगिताको उपाधिका लागि भिड्ने भएका छन् । बुधबार भएको सेमिफाइनलमा बालुवाटारले हिमालय क्रिकेट एकेडेमीलाई १४ रनले तथा महावीरले न्युभिजनलाई ७५ रनले हराउँदै एकअर्कासँगको भेट पक्का गरेका थिए ।

पहिलो सेमिफाइनलमा टस जितेर ब्याटिङ गरेको महावीरले निर्धारित २५ ओभरमा ७ विकेट गुमाउँदै १ सय ८९ रन बनाएको थियो । महावीरका जितेन्द्र सिंह ठकुरीले ६३ बलमा ८ चौका र २ छक्का सहित ७८ रनको योगदान दिए । राम कुवर ३५, दीपेन्द्र मैनाली र रविन जोशीले समान ११ रन जोडे ।

न्युभिजनका बबिन शर्माले ५ ओभरमा २२ रन खर्चेर ४ विकेट लिए । राम चौधरी २ र विकेक चन्दको नाममा १ विकेट रह्यो । १ सय ९० रनको विजयी लक्ष्य पछ्याएको न्युभिजन २३.४ ओभरमा १ सय १४ रनमा अल आउट भयो । बिनम क्षेत्री २३, लोकेश रेग्मी १९ र राम चौधरीले १८ रन जोडे । जितेन्द्र सिंह ठकुरीले ३.४ ओभरमा १५ रन खर्चेर ४ विकेट लिए । सञ्जम रेग्मीको नाममा ३ विकेट रह्यो ।

अर्को सेमिफाइनलमा टस जितेर ब्याटिङ गरेको बालुवाटारले २५ ओभरमा ९ विकेट गुमाउँदै १ सय ४८ रन जोडेको थियो । सुमन उदय ३५, सञ्जय श्रेष्ठ १९, प्रविन जोशी २३, सोनु तामाङ १० र सुवास खकुरेलले २१ रन बनाए । कौशल रुपाखेती ३ र प्रदीप कुमार बिकेले २ विकेट लिए ।

हिमालयले २५ ओभरमा ९ विकेट गुमाउँदै १ सय ३४ रन बनायो । भुपेन्द्र थापा क्षेत्रीले ४६, दीपक बोहरा १५, प्रदीप कुमार बिकेले १६ र प्रतिस जिसीले १९ रनको योगदान दिए । अभिनाश बस्याल ३, सुमन उदय र सोनु तामाङले समान २ विकेट लिए ।