एलेन्सी – इरफान पठानको आक्रामक अर्ध शतकमा भारत लेजेन्ड्सले लेजेन्ड्स वर्ल्ड सिरिजमा लगातार दोस्रो जित निकालेको छ ।

मंगलबार राती भारत लेजेन्ड्सले श्रीलंका लेजेन्ड्सलाई ५ विकेटले पराजित गर्दै लगातार दोस्रो जित हात पारेको हो । १ सय ३९ रनको विजयी लक्ष्य पछ्याएको भारत लेजेन्ड्सले १८.४ ओभरमा ५ विकेट गुमाउँदै पुरा गर्यो । एक समय हार नजिक पुगेको भारत लेजेन्ड्सलाई इरफान पठानले ३१ बलमा ६ चौका र ३ छक्का सहित ५७ रनमा अविजित रहँदै जित दिलाए । त्यस्तै मोहम्मद कैफले ४५ बलमा ४ चौका र १ छक्का ४६ रनको योगदान दिए । मनप्रीत गोनी ११ रनमा अविजित रहे ।

पहिलो ओभरको तेस्रो बलमै कप्तान सचिन तेन्दुलकरलाई चामिन्डा भासले शुन्यमा क्याच आउट गराए । तेस्रो ओभरको अन्तिम बलमा विरेन्द्र सहवाग ३ रनमा रन आउट भए । भासले युवराज सिंहलाई १ रनमा क्याच आउट गराएपछि भारतले खराब सुरुवात गरेको थियो । सञ्जय बांगरलाई रंगना हेराथले १८ रनमा एलबिडब्लू आउट गरे । सञ्जयले १९ बलमा २ चौका प्रहार गरे । श्रीलंका चामिन्डा भासले ३ ओभरमा ५ रन खर्चेर २ विकेट लिए । रंगना हेराथ र सचिथ्रा सेनानायकेले १-१ विकेट लिए ।

त्यसअघि मुम्बईमा टस हारेर ब्याटिङको निम्तो पाएको श्रीलंका लेजेन्ड्सले निर्धारित २० ओभरमा ८ विकेट गुमाउँदै १ सय ३८ रन बनाएको थियो । श्रीलंका कप्तान तिलकरत्ने दिलशान र चमरा कपुगेदेराले २३–२३ रन जोडे । कप्तान दिलशानले २३ बलमा ४ चौका प्रहार गरे । रोमेश कालुविथाराना २१, सचिथ्रा सेनानायके १९, फरवेज माहरुफ र थिलान तुषाराले १०–१० रनको योगदान दिए । भारत लेजेन्ड्सका मुनाफ पटेलले ४ ओभरमा १९ रन खर्चेर ४ विकेट लिए । जाहिर खान, इरफान पठान, मनप्रीत गोनी र सञ्जय बांगरले १–१ विकेट लिए ।

श्रीलंका लेजेन्ड्सले पहिलो खेलमा अष्ट्रेलिया लेजेन्ड्सलाई ७ रनले हराएको थियो । भारत लेजेन्ड्सले पहिलो खेलमा वेस्ट इन्डिज लेजेन्ड्सलाई ७ विकेटले हराएको थियो । भारत लेजेन्ड्सले तेस्रो खेलमा शनिबार दक्षिण अफ्रिका लेजेन्ड्ससँग खेल्ने छ । श्रीलंका लेजेन्ड्सले तेस्रो खेलमा शुक्रबार दक्षिण अफ्रिकासँग प्रतिस्पर्धा गर्ने छ ।