एजेन्सी – अफगानिस्तानसँगको तेस्रो तथा अन्तिम टि ट्वान्टी खेलमा आयरल्यान्ड सुपर ओभरमा विजयी भएको छ । यस हारका बाबजुद सिरिज भने अफगानिस्तानले २-१ ले जित्यो ।

जितका लागि १ सय ४३ रनको विजयी लक्ष्य पछ्याएको अफगानिस्तानले निर्धारित २० ओभरमा ७ विकेट गुमाउँदै १ सय ४२ रन बनाएपछि खेल सुपर ओभरमा पुगेको थियो । सुपर ओभरमा अफगानिस्तानले १ विकेट गुमाउँदै ८ रन बनाएको थियो । जसक्रममा ९ रनको लक्ष्य पछ्याएको आयरल्यान्डका केभीन ओ ब्रायनले अन्तिम बलमा तीन रन चाहिँएको अवस्थामा स्पिनर राशिद खानलाई लङ अनमा छक्का प्रहार गर्दै जित पक्का गरे ।

त्यसअघि अफगानीस्तानका लागि ओपनर रहमानुल्लाह गुर्बाजले २९ बलमा ३ चौका र ३ छक्का सहित सर्वाधिक ४२ रनको योगदान दिए । उस्मान घानी १८, करीम जानत १७ र कप्तान असगर अफगानले ३२ रन जोडे । राशिद खान ६ बलमा १ चौका र १ छक्का सहित १४ रनमा अविजित रहे । आयरल्यान्डका ग्यारेथ डेलानी र सिमी सिंहले २–२ विकेट लिए ।

भारतको ग्रेटर नोएडामा टस जितेर पहिला ब्याटिङ रोजेको आयरल्यान्डले निर्धारित २० ओभरमा ८ विकेट गुमाउँदै १ सय ४२ रन बनाएको थियो । ओपनर पल स्टर्लिङ शुन्यमा आउट हुँदा केभीन ओ ब्रायन २६ रनमा क्याच आउट भए । ग्यारेथ डेलानीले २९ बलमा ५ चौका र १ छक्का सहित ३७ रनको योगदान दिए । हेरी टेक्टर ३१ सिमी सिंहले १२ रनको योगदान दिए । अफगानिस्तानका नवीन उल हक र क्वास अहमदले ३–३ विकेट लिए । मुजिब उर रहमान र राशिद खानको नाममा १–१ विकेट रह्यो ।

यो जितसँगै आयरल्यान्ड क्लिनस्वीप हुनबाट बचेको छ । अफगानिस्तान पहिलो खेलमा डकवर्थ लेविस पद्धतीको आधारमा ११ रन र दोस्रो खेलमा २१ रनले विजयी भएको थियो ।