काठमाडौं (हाम्रो खेलकुद)– पोखरा प्रिमियर लिग (पिपिएल) को फ्रञ्चाइज बुटवल ब्लास्टर्सले युवा क्रिकेटरहरुको विकासलाई लक्षित गर्दै झापाको पेट्रियोटिक क्रिकेट ट्रेनिङ सेन्टर र दमक क्रिकेट क्लबसँग सम्झौता गरेको छ ।

सम्झौता अनुसार बुटवलले पेट्रियोटिक र दमकसँग आबद्ध युवा क्रिकेटरहरुलाई आफ्नो प्रशिक्षण शिविरका साथै हाई पर्फर्मेन्स क्याम्पमा पनि सहभागि गराउने छ । पेट्रियोटिक र दमकका खेलाडीहरुले बुटवलको लोगो आफु प्रशिक्षण गर्दा र प्रतियोगितामा सहभागि हुँदाका जर्सिमा लगाउने छन् ।

बुटवलका प्रबन्ध निर्देशक अमित पोखरेल र दमक क्रिकेट क्लबका अध्यक्ष अबिस खनालले सम्झौता पत्रमा हस्ताक्षर गरेका थिए । एक बर्षे सम्झौताको अवधि दुवै पक्षको आपसी सहमतिमा थप्न पनि सकिने बताइएको छ ।

‘यो सम्झौताले हामी निकै उत्साहित छौं । आफ्नो प्रतिभा प्रस्फुटनका लागि प्लेटफर्मको खोजिमा रहेका युवा खेलाडीहरुका लागि यो राम्रो मौका हो,पेट्रियोटिकका अध्यक्ष रोशन धितालले भने ,’ आशा गरौं यो सम्झौता नेपाली क्रिकेटको समग्र बिकासमै सहयोग पुर्याउनेछ।’

दमक क्रिकेट क्लबले भविष्यमा आयोजना गर्ने प्रतियोगिताहरुमा पनि बुटवलले समहयोग गर्नेछ । कार्यक्रममा पेट्रियोटिककी उपाध्यक्ष प्रनिता पोखरेल र सचिव दिपेश रिमालको पनि उपस्थिति पनि रहेको थियो । पिपिएलको दोस्रो संस्करण केहि महिना अघि सम्पन्न भइसकेको छ ।