एजेन्सी – कप्तान तिलकरत्ने दिलशानको अलराउन्ड प्रर्दशनमा भारतमा जारी लेजेन्ड्स वर्ल्ड सिरिजमा श्रीलंका लेजेन्ड्सले विजयी सुरुवात गरेको छ ।

आइतबार राती श्रीलंका लेजेन्ड्सले अष्ट्रलिया लेजेन्ड्सलाई ७ रनले पराजित गर्दै विजयी सुरुवात गरेको हो । १ सय ६२ रनको विजयी लक्ष्य पछ्याएको अष्ट्रलिया लेजेन्ड्स १९.५ ओभरमा १ सय ५४ रनमा अल आउट भयो । अष्ट्रलिया लेजेन्ड्सका नाथन रियरडनले ५३ बलमा ९ चौका र ५ छक्का सहित ९६ रनको उत्कृष्ट इनिङ खेलेपनि अन्य खेलाडीको साथ नपाउँदा झिनो अन्तरको हार बेहोर्नु पर्यो ।

कप्तान ब्राड हडिनले १० र जेभियर डोहर्टीले १५ रन बनाउन बाहेक अन्यले दोहोरो अंकमा रन जोड्न सकेनन् । श्रीलंका तिलकरत्ने दिलशानले ३.५ ओभरमा ३५ रन खर्चेर ३ विकेट लिए । फरवेज माहरुफ र स्पिनर रंगना हेराथले २-२ विकेट लिए ।

त्यसअघि मुम्बईमा टस जितेर पहिला ब्याटिङ रोजेको श्रीलंकाले निर्धारित २० ओभरमा ८ विकेट गुमाउँदै १ सय ६१ रन बनाएको थियो । दिलशान १८, रोमेश कालुविथाराना ३०, चमारा कापुगेदरा २८, अजन्ता मेन्डिस १७ र माहरुफले २० रनको योगदान दिए । जेभियर डोहर्टी, जेसन क्रेजा र ब्राड होजले २-२ विकेट लिए ।

चैत्र ९ सम्म भारतको मुम्बईमा चल्ने सिरिजमा भारत, वेस्टइन्डिज, अष्ट्रलिया, श्रीलंका र दक्षिण अफ्रिका लेजेन्ड्सको टोली छ । लिग चरणपछि शीर्ष दुई टोली फाइनलमा पुग्ने छन् ।