विनोदबाबु रिजाल ,भरतपुर

 पुवुदु दसानायकले नेपाली क्रिकेटको सफल नेतृत्व गरे । ‘इन्टरनेसनल एक्सपोजर’ धेरै नपाएको नेपाली टोलीलाई अन्तर्राष्ट्रिय माहोलमा राम्रै छाप छोडिदिए । अहिले उनी नेपाली क्रिकेटको नेतृत्वमा छैनन् । तर, यहाँको माया भने मारेका छैनन् । केही न केही बहानामा उनी नेपाल आइरहन्छन् ।

पछिल्लोपटक उनी एभरेष्ट प्रिमियर लिग (ईपीएल)को बहानामा नेपाल आए । दुर्भाग्यवश कोरोना भाइरसको सन्त्रासको सिकार भई ईपीएल अनिश्चितकालका लागि स्थगित भएको छ । उनी अब क्यानडा फर्किंदै छन् । आइतबार आफूले प्रशिक्षण गर्ने भैरहवा ग्लाडियटर्स टिमबाट विदा भएर काठमाडौं फर्किंदै गर्दा उनी चितवनमा रोकिए । यहाँको भरतपुरमा बन्दै गरेको गौतमबुद्ध अन्तर्राष्ट्रिय क्रिकेट रंगशाला अवलोकन गरे ।
नेपालमा अन्तर्राष्ट्रियस्तरको क्रिकेट रंगशाला निर्माण भइरहेको देख्दा निकै खुसी लागेको बताए । उनले सन् २०११ मा नेपाली क्रिकेट टिमको प्रशिक्षण सम्हालेदेखि नै यस किसिमको रंगशाला लागि पहल गरेको स्मरण गर्दै ढिलै भए पनि निर्माण सुरु भएको देख्दा खुसी लागेको बताए । “खेल विकासका लागि रंगशाला नभई हुँदैन”, उनले भने, “यो रंगशालाले नेपाली क्रिकेटलाई माथि पु¥याउन ठूलो भूमिका निर्वाह गर्छ ।”

नेपालले अन्तर्राष्ट्रिय क्रिकेटमा निकै राम्रो स्थान बनाए पनि रंगशालाको अभाव निकै खड्किएको भन्दै उनले अघि भने, “एशोसिएट राष्ट्रहरुमा नेपाल निकै राम्रो टिम हो । नेपालमा केही कमी छ त यस किसिमको रंगशालाको जुन अब पूरा हुँदैछ ।” रंगशाला निर्माण भएपछि नेपाली राष्ट्रिय खेलाडी तथा चितवनका स्थानीय खेलाडीहरुले धेरै लाभ लिन सक्ने उनले बताए ।

यस्तै दसानायकेले नेपाल सधैं आफ्नो मनमा रहिरहने पनि बताए । उनले २०१६ मा नेपाली क्रिकेट टिम छोडेर गए पनि नेपालको माया भने सधैं रहिरहने पनि बताए । दसानायके सन् २०११ देखि २०१६ सम्म प्रशिक्षक रहँदा नेपालले डिभिजन ४, ३ र, २ को उपाधि नै जितेको थियो । उनकै प्रशिक्षणमा नेपाले सन् २०१४ को टी–२० विश्वकप क्रिकेट पनि खेल्ने खेलेको थियो ।

रंगशालामा खेल्ने सपना छः शरद

पुवुदुसँगै आएका नेपाली राष्ट्रिय क्रिकेट टिमका सदस्य शरद भेषावकरले संन्यासअघि हाल निर्माणाधीन गौतमबुद्ध अन्तर्राष्ट्रिय क्रिकेट रंगशालामा खेल्ने ठूलो सपना रहेको बताएका छन् । “हाम्रो सपनै थियो आफ्नै रंगशालामा खेल्ने”, उनले भने, “यहाँभित्र आउँदा त्यो सपना चाँडै पूरा हुन्छ जस्तो लागेको छ । मेरो पनि सपना छ यहाँ खेल्ने । आशा गर्छु त्यो सपना चाँडै पूरा हुन्छ ।”

यस्तै उनले खेलाडीहरुको तर्फबाट रंगशाला निर्माणका लागि सक्दो सहयोग गर्ने बताए । रंगशाला निर्माण सम्पन्न गर्नका लागि आर्थिक स्रोत नै मुख्य विषय भएको भन्दै उनले त्यसका लागि योजना बनाएर अघि बढ्ने बताए । “यहाँ आर्थिक स्रोतको एकदमै आवश्यक छ”, उनले भने, “त्यसका लागि हामी खेलाडीहरुले आफ्नो तर्फबाट र विभिन्न देशमा रहेका नेपालीहरुसँग सहयोग अपिल गरेर स्रोत जुटाउन सक्छौं ।”

उनले खेलाडीहरुले श्रमदान गरेर पनि सहयोग गर्न सक्ने बताए । सहयोगका लागि उत्साहित रहेको बताए पनि खेलाडीले तत्कालै आफैंले आर्थिक सहयोग जुटाउन नसक्ने यथार्थ पनि उनले सुनाए । “खेलाडीले दुई वर्षदेखि तलब पाएका छैनन्”, उनले भने, “यो अवस्थामा हामी आफैं सहयोग गर्न त सक्दैनौं । तर, अपील भने गर्न सक्छौं ।”

श्रमदान गर्न चाहन्छुः प्रदीप

राष्ट्रिय क्रिकेट टोलीका अर्का सदस्य प्रदीप ऐरीले निर्माणाधीन रंगशालामा श्रमदान गर्ने चाहना व्यक्त गरेका छन् । निर्माणाधीन रंगशालाको अवलोकन गर्दै उनले आफूले मैदान र पीच निर्माणको लागि क्युरेटर प्रशिक्षण लिएकोले त्यसलाई रंगशाला निर्माणका लागि उपयोग गर्न चाहेको बताए । “मैले क्युरेटर कोचिङ लिएको छु, क्रिकेटबाहेकको खाली समयमा म यहाँ आएर श्रमदान गर्न चाहन्छु”, उनले भने, “म निकै उत्साहित छु ।”

करिब ३ अर्ब लागतमा २ वर्षभित्र सम्पन्न गर्ने योजनासहित चितवनको रामपुरमा ३० हजार दर्शक क्षमताको गौतमबुद्ध अन्तर्राष्ट्रिय क्रिकेट रंगशाला निर्माण भइरहेको छ ।