एजेन्सी – ओपनर तथा कप्तान विरेन्द्र सहवागको उत्कृष्ट ब्याटिङमा मुम्बईमा शनिबारदेखि सुरु भएको लेजेन्ड्स वर्ल्ड सिरिजमा भारत लेजेन्ड्सले विजयी सुरुवात गरेको छ ।

शनिबार वेस्टइन्डिज लिजेन्ड्सलाई ७ विकेटले पराजित गर्दै भारतले विजयी सुरुवात गरेको हो । जितको लागि १ सय ५१ रनको विजयी लक्ष्य पछ्याएको भारतले १८.२ ओभरमा ३ विकेट गुमाउँदै पुरा गर्यो । भारत लेजेन्ड्सको सहज जितमा ओपनर विरेन्द्र सहवाग ५७ बलमा ११ चौका सहित ७४ रनमा अविजित रहे । त्यस्तै विश्व क्रिकेटकै सर्वाधिक सफल ब्याट्सम्यान तथा भारतीय पुर्व कप्तान सचिन तेन्दुलकर २९ बलमा ७ चौका सहित ३६ रनमा आउट भए ।

पहिलो विकेटका लागि विरेन्द्र सहवाग र सचिन तेन्दुलकरले १०.२ ओभरमा ८२ रनको साझेदारी गर्दै राम्रो सुरुवात दिलाएका थिए । युवराज सिंह ७ बलमा १ छक्का सहित १० रनमा अविजित रहे । मोहम्मद कैफ १४ रनमा आउट भए । कार्ल हुपरले २ विकेट लिए ।

त्यसअघि मुम्बईमा टस हारेर पहिला ब्याटिङको निम्तो पाएको वेस्ट इन्डिज लिजेन्ड्सले निर्धारित २० ओभरमा ८ विकेट गुमाउँदै १ सय ५० रन बनाएको थियो । वेस्ट इन्डिजका शिवनारायण चन्द्रपलले ४१ बलमा ६ चौका र २ छक्का सहित सर्वाधिक ६१ रनको योगदान दिए । डारेन गंगा ३२, कप्तान ब्रायन लारा १७, टिनो बेस्ट ११ र डन्जा हयातले १२ रन जोडे ।

भारतका जाहिर खान, मुनाफ पटेल र प्रज्ञान ओझाले २–२ विकेट लिए । यस सिरिजमा भारत, वेस्टइन्डिज, अष्ट्रलिया, श्रीलंका र दक्षिण अफ्रिका लेजेन्ड्स खेलाडीको टोली छ । जसमा लिग चरणपछि शीर्ष दुई टोली फाइनलमा पुग्नेछन् ।