एजेन्सी – तेस्रो तथा अन्तिम एकदिवसिय खेलमा अष्ट्रेलियालाई ६ विकेटले पराजित गर्दै घरेलु टोली दक्षिण अफ्रिकाले सिरिज क्लिनस्वीप गरेको छ । शनिबार जितका लागि २ सय ५५ रनको विजयी लक्ष्य पछ्याएको दक्षिण अफ्रिकाले ४५.३ ओभरमा विकेट ४ गुमाउँदै पुरा गर्यो ।

दक्षिण अफ्रिकाको सहज जितमा जेजे स्मट्सले ९८ बलमा १२ चौका सहित ८४ रनको योगदान दिए । ओपनर जानेमान मालन २३, कप्तान क्विन्ट डी कक २६, काइल भेरिन ५० रनमा आउट भए । हेनरिक क्लासेन ६३ बलमा १० चौका र १ छक्का सहित ६८ रनमा अविजित रहे । अष्ट्रेलिया जोश हेजलवुडले २, केन रिजर्डसन र एडम जम्पाले १–१ विकेट लिए ।

त्यसअघि टस जितेर पहिला ब्याटिङको निम्तो पाएको पाहुना टोली अष्ट्रलियाले निर्धारित ५० ओभरमा ७ विकेट गुमाउँदै २ सय ५४ रन बनाएको थियो । युवा ब्याट्सम्यान मार्नस लाबुसेनले १ सय ८ बलमा ८ चौका सहित १ सय ८ रनको शतकीय इनिङ खेलेपनि जितको लागि पर्याप्त हुन सकेन । लाबुसेनको यो पहिलो ओडीआई शतक हो । लाबुसेनलाई अन्तिम ओभरको पाँचौ बलमा एनरिच नोर्टजले बोल्ड गरे ।

ओपनर डेविड वार्नर ४, कप्तान आरोन फिन्च २२ र स्टिभ स्मिथ २० रनमा आउट भए । डीआर्सी सट ३६, मिचेल मार्श ३२ रमा आउट हुँदा झेय रिचर्डसन २४ रनमा अविजित रहे । दक्षिण अफ्रिका एनरिच नोर्टजे र जेजे स्मट्सले २–२ विकेट लिए । दक्षिण अफ्रिका पहिलो खेलमा ७४ रन र दोस्रो खेलमा ६ विकेटले विजयी भएको थियो ।