एजेन्सी – ओपनर तमीम इकबाल र लिटन दासको कीर्तिमानी दोहोरो शतकीय साझेदारीमा बंगलादेशले तेस्रो तथा अन्तिम खेलमा जिम्बावेलाई डकवर्थ लेविस पद्धतीको आधारमा १ सय ३२ रनको फराकिलो अन्तरले पराजित गरेको छ ।

योसँगै तीन ओडीआई खेलको सिरिज बंगलादेशले क्लिनस्वीप गरेको छ । जितको लागि ३ सय २३ रनको विशाल लक्ष्य पछ्याएको पाहुना टोली जिम्बावे ३७.३ ओभरमा २ सय १८ रनमा समेटियो । जिम्बावेका सिकन्दर राजाले ५० बलमा ५ चौका र २ छक्का सहित सर्वाधिक ६१ रनको योगदान दिए । रेगिस चकब्वा ४३, ब्रेन्डन टेलर १४, कप्तान सेन विलियम्स ३० र वेस्ली मधेभरेले ४२ रन जोडे ।

बंगलादेशका मोहम्मद सैफुद्दीनले ६.३ ओभरमा ४१ रन खर्चेर ४ विकेट लिए । त्यस्तै अन्तिम ओडीआई कप्तानी गरेका मर्शफे मोर्तजाले १ विकेट लिए । ताइजुल इस्लाम २, अफिफ सुसैन र मुस्ताफिजुर रहमानको नाममा १–१ विकेट रह्यो ।

त्यसअघि टस हारेर ब्याटिङको निम्तो पाएको बंगलादेशले निर्धारित ४३ ओभरमा ३ विकेट गुमाउँदै ३ सय २२ रन बनाएको थियो । ओपनर तमीम इकबाल १ सय ९ बलमा ७ चौका र ६ छक्का सहित १ सय २८ रनमा अविजित रहे । तमीमको यो ओडीआई करिअरको १३ औं शतक हो ।

विकेटकिपर लिटन दास १ सय ४३ बलमा १६ चौका र ८ छक्का सहित १ सय ७६ रनमा क्याच आउट भए । कार्ल मुम्वाले ४१ औं ओभरको पहिलो बलमा उनलाई राजाबाट क्याच आउट गराएपछि दोहोरो शतक बनाउन चुकेका थिए । दासको यो ओडीआई करिअरको तेस्रो शतक हो ।

योसँगै लिटन दास बंगलादेशबाट एकै इनिङमा ओडीआईमा सर्वाधिक रन बनाउने खेलाडी बनेका छन् । दासले यसअघि जिम्बावेसँग दोस्रो खेलमा तमीमले बनाएको १ सय ५८ रनको कीर्तिमान तोडेका हुन् । पहिलो विकेटका लागि दास र तमीमले ४०.५ ओभरमा २ सय ९२ रनको कीर्तिमान साझेदारी गरेपछि बंगलादेशले विशाल योगफल तयार पारेको थियो । जुन बंगलादेशबाट ओडीआईमा भएको कुनै पनि विकेटका लागि उच्च साझेदारी हो ।

ओडीआई इतिहासमा भने यो तेस्रो ठूलो ओपनिङ साझेदारी पर्दछ । बंगलादेश पहिलो खेलमा १ सय ६९ र दोस्रो ४ विकेटले विजयी भएको थियो । लिटन दास प्लेयर अफ द म्याच चुनिए । त्यस्तै प्लेयर अफ द सिरिज तमीम र लिटनले संयुक्त रुपमा पाए ।