काठमाडौं (हाम्रो खेलकुद) – मुलपानीमा जारी काठमाडौं जिल्ला सिनियर क्रिकेट छनोट प्रतियोगिता अन्तर्गत शुक्रबार ओसिस क्रिकेट एकेडेमी र हिमालय क्रिकेट एकेडेमी विजयी भएका छन् । पहिलो खेलमा ओसिस क्रिकेट एकेडेमीले यङ्गल क्रिकेट क्लबलाई २१ रनले पराजित गर्यो ।

मुलपानी क्रिकेट मैदानमा टस जितेर ब्याटिङ रोजेको ओसिस २५ ओभरमा अल आउट हुँदै १ सय ५७ रन बनाएको थियो । युवा ब्याट्सम्यान सचिन शर्माले ६८ बलमा ९ चौका सहित ७५, सुदीप बस्नेत १८, आइश भट्टाई २६, सुमित श्रेष्ठ ११ र आयुष बानियाले १० रनको योगदान दिए । प्रमेश बिक्रम डिसीले ४ र राम प्रधानले २ विकेट लिए ।

१ सय ५८ रनको विजयी लक्ष्य पक्ष्याएको यङ्गल क्लब २२.१ ओभरमा १ सय ३६ रनमा अल आउट भयो । उसका लक्ष्मण प्रधान १८, पंकज कोइराला ३८, दिपेश दास ४० र विजय बरकोटीले १६ रनको योगदान दिए । ओसिसका सन्देश कार्कीले ४ ओभरमा २ मेडन राखेर ६ रन खर्चेर ६ विकेट लिए ।

त्यस्तै आजको दोस्रो खेलमा हिमालय क्रिकेट एकेडेमीले फेभर क्रिकेट क्लबलाई डकवर्थ लेविस पद्धतीको आधारमा ४४ रनले पराजित गर्यो । हिमालयले टस जितेर पहिला ब्याटिङ गर्दै १८ ओभरमा ३ विकेट गुमाउँदै १ सय ३० रन बनाएको थियो । उसका प्रदीप कुमार विकेट ५४ बलमा ११ चौका सहित ५७ रनमा अविजित रहे । भुपेन्द्र थापा ११ र राजत तिमिल्सिना ४६ र प्रतिस जिसीले १२ रनको योगदान दिए ।

डकवर्थ लेविस पद्धतीको आधारमा फेभर क्लबले १८ ओभरमा जितको लागि १ सय ५५ रनको लक्ष्य पाएको थियो । तर फेभरले ८ विकेट गुमाउँदै १ सय १० रन मात्रै बनाउन सक्यो । उसका आकश चन्द १४, कदीर अन्सारी १२, निरज भट्राई १८ रनमा आउट भए । हिमालयका शरद खड्काले ४ ओभरमा १५ रन खर्चेर ५ विकेट लिए । त्यस्तै प्रदीप कुमार २ र भुपेन्द्र थापाले १ विकेट लिए ।

काठमाडौं जिल्ला छनोटमा क्लब र एकेडेमी गरि १२ टोली रहेकाछन् । जसलाई ४ समुहमा विभाजन गरिएको छ । समुह चरणको खेलपछि समुह विजेता सेमिफाइनलमा प्रवेश गर्ने छन् । नेपाल क्रिकेट संघ (क्यान) ले चैत्रमा आयोजना गर्ने एक दिवसिय राष्ट्रिय प्रतियोगिताको लागि प्रदेश ३ को छनोटको लागि काठमाडौंले यस प्रतियोगिताको प्रर्दशनको आधारमा आफ्नो टोली बनाउने छ ।