काठमाडौं (हाम्रो खेलकुद) – नेपाल, स्कटल्याण्ड र नामिबियाबीच अर्को वर्ष टि ट्वान्टी त्रिकोणात्मक सिरिज हुने सम्भावना रहेको छ ।

आईसीसी विश्वकप लिग २ अन्तर्गत नामिबियामा नेपाल र स्कटल्याण्डसँग हुने एक दिवसिय त्रिकोणात्मक सिरिजको क्रममा टि ट्वान्टी सिरिज पनि हुन सक्ने नेपाल क्रिकेट संघ (क्यान) का सचिव अशोकनाथ प्याकुरेलले जानकारी दिए ।

आईसीसी विश्वकप लिग २ अन्तर्गत नामिबिया, नेपाल र स्कटल्याण्डबीच त्रिकोणात्मक सिरिज वैशाख ८ देखि १५ गते सम्म हुने छ । त्यहि समयमा नामिबियाले टि ट्वान्टी त्रिकोणात्मक सिरिजको लागि क्यानलाई प्रस्ताव राखेको छ ।

‘बाहिर हल्ला भएजस्तो खेल्नेनै पक्का नै भएको चाहिँ होइन, नामिबियाले प्रस्ताव मात्रै राखेको छ । विश्वकप लिग २ को क्रममा टि ट्वान्टी त्रिकोणात्मक सिरिज खेल्यौं भने नामिबियाको प्रस्ताव हो’, उनले भने,‘ यस विषयमा हामीले तीनै राष्ट्रसँग र आईसीसीसँग कुरा गर्नुपर्छु ।’

सचिव प्याकुरेलले नामिबियाको प्रस्तावका विषयमा छलफल गरिने बताए । हाम्रो बार्षिक कार्यक्रम पनि हेर्नुपर्छ । थाईल्यान्डबाट टोली फर्केपछि कप्तान, म्यानेजर र प्रशिक्षकसँग सल्लाह गरेर खेल्ने नखेल्ने थाहा हुन्छ , उनले भने, ‘गत महिना नेपाल आएको बेला ओमानले पनि टि ट्वान्टी सिरिज खेल्ने भनेको थियो । तर पछि विभिन्न कारणले नखेल्ने भयो, त्यसैले प्रस्ताव आउँदैमा खेल्ने भन्ने हुँदैन ।’

विश्वकप लिग२ मा नेपालले अघिल्लो महिना घरेलु मैदानमा ओमान र अमेरिकासँग त्रिकोणात्मक सिरिज खेलेका थियो । जसमा ओमानसँग दुवै खेलमा पराजित हुँदा नेपालले अमेरिकालाई दुवै खेलमा हराएको थियो ।

७ राष्ट्र सहभागि आईसीसी विश्वकप लिग–२ सन् २०२२ जनवरी सम्म चल्ने छ । जसमा शीर्ष तीन टोली त्यसैवर्ष हुने एक दिवसिय विश्वकप ग्लोबल क्वालिफायरमा स्थान बनाउने छन् भने चार टोलीले क्वालिफायर खेल्नुपर्ने हुन्छ ।