एजेन्सी – अष्ट्रेलियामा जारी आईसीसी महिला टि२० विश्वकपको फाइनलमा भारत र अष्ट्रेलिया पुगेका छन् ।

बुधबार पहिलो सेमिफाइनलमा वर्षाको कारण भारत र इंग्ल्यान्डबीचको खेल टस पनि नभई रद्ध हुन भयो । खेल रद्ध हुँदा भारत समुह ए को विजेताको कारण भारत फाइनलमा प्रवेश गर्दा समुह बी को उप विजेता इंग्लयान्ड बाहिरिन पुग्यो । भारत पहिलो पटक महिला टि२० विश्वकपको फाइनलमा प्रवेश गरेको हो ।

त्यस्तै दोस्रो सेमिफाइनलमा घरेलु टोली तथा चार पटकको च्याम्पियन अष्ट्रेलियाले दक्षिण अफ्रिकालाई डकवर्थ लेविस पद्धती अनुसार ५ रनले पराजित गर्दै छैटौं पटक फाइनलमा स्थान बनाए । सिड्नीमा टस हारेर ब्याटिङको निम्तो पाएको अष्ट्रेलियाले ५ विकेटको क्षतिमा १ सय ३४ रन बनाएको थियो । अष्ट्रेलियाकी कप्तान मेग लानिङले ४९ बलमा ४ चौका र १ छक्का सहित ४९ रनमा अविजित रहिन् । बेथ मुनी २८, एलेसा हेली १८ र राचेल हेन्स १७ रन जोडीन् । दक्षिण अफ्रिकाकी दी क्लर्कले ३ विकेट लिइन् ।

वर्षाको कारण दोस्रो इनिङमा केहि समय वर्षाको कारण खेल रोकिदा दक्षिण अफ्रिकाले डकवर्थ लेविस पद्धतीको आधारमा १३ ओभरमा ९८ रनको लक्ष्य पाएको थियो । उक्त लक्ष्य पक्ष्याएको दक्षिण अफ्रिका महिला टोलीले १३ ओभरमा ५ विकेट गुमाउँदै ९२ रन मात्रै बनाउन सके ।

फाइनल आइतबार मेलबर्न क्रिकेट मैदानमा हुने छ । यता पहिलो पहिलो सेमिफाइनलमा खेलनै सुरु नभई भारत फाइनलमा प्रवेश गरेपछि वैकल्पिक दिन नराखेको भन्दै आईसीसीको आलोचना भई रहेको छ ।