काठमाडौं (हाम्रो खेलकुद) – युवा ब्याट्सम्यान शंकर रानाको उत्कृष्ट ब्याटिङमा भैरहवा स्थित सिद्धार्थ रंगशालामा भएको फाइनलमा एसियन च्यालेन्जर ट्रफीको उपाधि शंकरनगर क्रिकेट क्लबले जितेको छ ।

बिहीबार फाइनलमा शंकनगरले राइनो क्रिकेट क्लब नेपाललाई २६ रनले हराउँदै उपाधि जितेको हो । विजेता शंकनगरले ३ लाख २० हजार रुपैयाँ प्राप्त गर्यो । सिद्धार्थ रंगशालामा टस हारेर ब्याटिङ थालेको शंकनरले निर्धारित २० ओभरमा ६ विकेट गुमाउँदै १ सय ७७ रन बनाएको थियो । उपाधि जिताउन ओपनर शंकर रानाले ५३ बलमा ४ चौका र ५ छक्का सहित ७६ रनको महत्वपूर्ण योगदान दिए ।

सन्दीप सुनार २२, देव खनाल ४, सौरभ खनाल ९, तुल बहादुर थापा २५ र सुरजले १९ रनको योगदान दिए । राइनोका यू१९ का स्पिनर सुर्य तामाङले २, सिनियर टोलीका तीब्र गतिका बलर कमलसिंह ऐरी, रोहित कुमार पौडेल र रमेश कुमारले १-१ विकेट लिए ।

१ सय ७८ रनको विजयी लक्ष्य पक्ष्याएको राइनो १९.५ ओभरमा १ सय ५१ रनमा अल आउट भयो । सिनियर टोलीका रोहित कुमार पौडेलले ओपनिङ गर्दै ५४ बलमा ६ चौका र ३ छक्का सहित ७५ रनको योगदान दिएपनि टोलीको हार टार्न सकेनन् । लोकेश बम ८, गजेन्द्र बोहरा १७, प्रकाश केसी १५ र धिरज शाहीले २१ रनको योगदान दिए । युवा स्पिनर अनिल खरेलले ४ ओभरमा १५ रन खर्चेर ३ विकेट लिए ।