काठमाडौं (हाम्रो खेलकुद) – एसीसी इस्टर्न रिजन टि२० प्रतियोगितामा आयोजक थाईल्यान्डले नेपाललाई ६७ रनको सामान्य लक्ष्य दिएको छ ।

बैंकक स्थित टेर्डथाई क्रिकेट मैदानमा टस जितेर ब्याटिङ रोजेको थाईल्यान्ड २० ओभरमा अल आउट हुँदै ६६ रनमा समेटियो । यो नेपालले टि ट्वान्टी आईमा विपक्षीलाई रोकेको इतिहासकै कम योगफल हो । यसअघि नेपालले सन् २०१४ को टि ट्वान्टी विश्वकपमा हङकङलाई ६९ रनमा अल आउट गरेको थियो । नेपालको कसिलो बलिङ सामु थाईल्यान्डका ९ खेलाडीले दोहोरो अंकमा रन छुन सकेनन् । यद्यपि नेपालले १७ रन अतिरिक्त खर्चियो ।

नेपलालाई पहिलो सफलता तीब्र गतिका बलर करण केसीले दिलाए । दोस्रो ओभरको पाँचौ बलमा करणले नवीद पठानलाई अभिनाश बोहराबाट ८ रनमा क्याच आउट गराए । पारस खड्काको तेस्रो ओभरको चौथो बलमा दीपेन्द्र सिंह ऐरीले डानियल जेकब्सलाई शुन्यमा रन आउट गराए । करणले वन्चना उइसुकलाई आठौं ओभरको अन्तिम बलमा २ रनमा बोल्ड आउट गरे । करणले दशौं ओभरको दोस्रो बलमा रेर्बोट रैनालाई २ रनमा बोल्ड आउट गरे ।

त्यस्तै भुवन कार्कीले हेन्नो जोर्डनलाई १३ औं ओभरको चौथो बलमा १३ रनमा बोल्ड आउट गर्दै आफ्नो डेब्यु टि ट्वान्टी पहिलो विकेट लिए । सन्दीपले १४ औं ओभरको पाँचौ बलमा जियाउल हकलाई ५ रनमा एलबिडब्लू आउट गरे । इस्माईल सरदारलाई २ रनमा बोल्ड आउट गरे ।

सन्दीप लामिछानेले ४ ओभरमा ९ रन खर्चेर १ विकेट लिए । टि ट्वान्टी आईमा डेब्यू गरेका भुवन कार्कीले ४ ओभरमा ६ रन खर्चेर १ विकेट लिए । अभिनाश बोहराले ४ ओभरमा २३ रन खर्चेर २ विकेट लिए । करण केसीले ४ ओभरमा १२ रन खर्चेर ३ विकेट लिए ।