काठमाडौं(हाम्रो खेलकुद) – बायाँ हाते स्पिनर भुवन कार्कीले टि ट्वान्टी आईमा डेब्यू गर्दै छन् । थाईल्यान्डमा जारी एसीसी इस्टर्न रिजन टि२० प्रतियोगितामा भुवनले थाईल्यान्डविरुद्ध टि ट्वान्टी आईमा डेब्यू गर्न लागेका हुन् ।

बैंकक स्थित टेर्डथाई क्रिकेट मैदानमा भएको टसमा थाईल्यान्डका कप्तान विचानाथ सिंहले टस जितेर पहिला ब्याटिङ गर्ने निर्णय लिएका छन् । जसमा नेपालका कप्तान ज्ञानेन्द्र मल्लले बुझाएको प्लेइनिङ ११ मा एक परिवर्तन गर्दै स्पिनर भुवन कार्कीले स्थान बनाएका छन् ।

भुवनले स्पिनर सुशन भारीको स्थान लिएका हुन् । स्पिनर सुशन भारीले मलेसियाविरुद्ध ३ ओभर बलिङ गर्दै २६ रन खर्चिदा विकेट लिन नसक्दा हङकङविरुद्ध ४ ओभरमा ३७ रन खर्चिदै २ विकेट लिएका थिए । भुवनले २०१७ मार्चमा बंगलादेशमा भएको एसीसी इमर्जिङ एसिया कपमा हङकङपछि त्यस यता पटक पहिलो अन्तर्राष्टिय खेल खेल्न लागेका हुन् ।

भुवनले सन् २०१२ मै कुवेतविरुद्ध राष्ट्रिय टोलीबाट डेब्यू गरेका थिए । त्यसै वर्ष अष्ट्रेलियामा भएको यू१९ विश्वकपमा उनले ६ खेलमा ९ विकेट लिएका थिए । लगातार दुई वर्ष उमेर समुहमा उत्कृष्ट प्रर्दशन गरेका भुवन सन् २०१४ मा भएको नेपाल प्रिमियर लिगमा पन्चकन्या तेजबाट १५ विकेट लिँदै म्यान अफ द सिरिज नै चुनिए । सन् २०१४ मा डिभिजन थ्रीमा राष्ट्रिय टोलीबाट दुई खेल खेल्दै ७ विकेट लिए । नेपाललाई डिभिजन थ्रीको उपाधि दिलाउन फाइनलमा युगान्डाविरुद्ध भुवनले ४ विकेट लिएका थिए ।

सन् २०१५ जनवरी २४ मा डिभिजन टु अन्तर्गत तेस्रो स्थानको लागि केन्यासँग भएको खेलमा उनले लिष्ट ए डेब्यू गरे । केन्यासँगको डेब्यू खेलमा भुवनले १० ओभरमा १ मेडन सहित ३१ रन खर्चेर १ विकेट लिए । २०१७ मार्चमा बंगलादेशमा भएको एसीसी इमर्जिङ एसिया कपमा भुवनले बंगलादेश यू२३ र हङकङ विरुद्ध खलेका थिए ।

पछिल्लो समय फ्रेन्चाइज लिगमा निरन्तर उत्कृष्ट प्रर्दशन गरेपछि भुवन टि२० टोलीमा पर्दै तीन वर्षपछि पुनरागमन गर्न सफल भए । गत फागुनमा सीवाईसी अत्तरियालाई धनगढी प्रिमियर लिगको उपाधि दिलाउन भुवनले ७ खेलमा १४ विकेट लिँदै सर्वोत्कृष्ट बलर समेत चुनिए । दोस्रो संस्करणमा पोखरा प्रिमियर लिगमा चितवन राईनोज च्याम्पियन बन्दा भुवनले ६ खेलमा १० विकेट लिँदै आफ्नो उत्कृष्ट लयलाई निरन्तरता दिए ।

घरेलु क्रिकेटमा सशस्त्र प्रहरी बलमा आबद्ध भुवन स्पिन बलिङमात्रै होइन तल्लोक्रममा आक्रामक ब्याटिङका लागि समेत परिचित छन् । भुवन नेपालबाट टि ट्वान्टी आई क्याप लगाउने ३१ औं खेलाडी हुन् ।

नेपालको प्लेइङ ११ :

ज्ञानेन्द्र मल्ल (कप्तान), दीपेन्द्र सिंह ऐरी, पारस खड्का, विनोद भण्डारी, आरिफ शेख, करण केसी, सन्दीप लामिछाने, अभिनाश बोहरा, कुशल मल्ल, भुवन कार्की र पवन सरार्फ ।

बेन्च : सुशन भारी, किशोर महतो र सन्दीप जोरा ।