एजेन्सी – जिम्वाबेसँगको दोस्रो एक दिवसिय खेलमा घरेलु टोली बंगलादेशले ४ रनको रोमाञ्चक जित हात पारेको छ । जितको लागि जिम्बावेलाई अन्तिम ओभरमा २० रन चाहिएको अवस्थामा १ विकेट गुमाउँदै १५ रन बनाउन सक्यो । बंगलादेशले प्रस्तुत गरेको ३ सय २३ रनको लक्ष्य पक्ष्याएको जिम्बावेले निर्धारित ५० ओभरमा ८ विकेट गुमाउँदै ३ सय १८ रन बनाउन सक्यो ।

जिम्बावेका डोनाल्ड तिरिपानोले तल्लोक्रममा २८ बलमा २ चौका र ५ छक्का सहित ५५ रन जोड्दै खेललाई रोमाञ्चक बनाए । अलराउन्डर सिकन्दर राजाले ५७ बलमा ५ चौका र २ छक्का सहित सर्वाधिक ६६ रनको योगदान दिए । ओपनर तिनाशे कमुनहुखमेले ५१, बे्रन्डन टेलर ११, सेन विलियम्स १४, विस्ले मधेवी ५२ रनमा आउट भए ।

बंगलादेशका ताइजुल इस्लामले ३, मोशरफे मोर्तजा, शाईफुल इस्लाम, मेहदी हसन र अल अमिन हुसैनले १–१ विकेट लिए । त्यसअघि टस जितेर पहिला ब्याटिङ थालेको बंगलादेशले निर्धारित ५० ओभरमा ८ विकेट गुमाउँदै ३ सय २२ रन बनाएको थियो । ओपनर तमीम इकबालले १ सय ३६ बलमा २० चौका र ३ छक्का सहित १ सय ५८ रनको उत्कृष्ट शतकीय इनिङ खेले ।

तमीमको ओडीआई करिअरको यो उच्च तथा १२ औं शतक हो । विकेटकिपर मुश्फिकुर रहीमले ५५, महमुदुल्लाह ४१ र मोहम्मद मिथुन ३२ रनको योगदान दिए । जिम्बावेका कार्ल मुम्बा र डोनाल्ड तिरिपोनोले २–२ विकेट लिए । बंगलादेश पहिलो खेलमा १ सय ६९ रनले विजयी भएको थियो । तेस्रो तथा अन्तिम खेल शुक्रबार हुने छ ।