काठमाडौं (हाम्रो खेलकुद) – इङ्ल्यान्ड भ्रमणमा रहेको नेपालले अभ्यास खेलमा मेरिलेबोन क्रिकेट क्लब (एमसिसी) लाई ४१ रनले हराएको छ । लर्डस क्रिकेट मैदानमा टस जितेर ब्याटिङ गर्दै ५० ओभरमा ८ विकेट गुमाएर २ सय १७ रन बनाएको थियो । जवाफमा एमसिसी ४७.२ मा सबै विकेट गुमाएर १ स ७६ रन बनाएको थियो ।

एमसिसीलाई रोक्ने क्रममा बसन्त रेग्मी र सागर पुनले समान ३ विकेट लिए । बसन्तले ९.२ ओभरमा १ मेडन राख्दै ३७ रन दिए । १० ओभर बलिङ गरेका सागरले २ मेडन राखेर ३५ रन खर्चे । सोमपाल कामीले २ तथा शक्ति गौचन र सन्दीप लामिछानेले समान १ विकेट लिए । जिए एडिरले शतक बनाएपनि टोलीका अन्य खेलाडी जम्न सकेनन् ।
ओपनर एडिरले सय रन बनाए भने अर्का ओपनर एस क्लार्कले १६ र आरएम विलक्लिन्सनले २० बाहेक अन्य खेलाडीले दोहोरो आँकडामा रन जोड्न सकेनन् ।
त्यसअघि नेपालका लागि तल्लो क्रमका ब्याट्सम्यान अविजित रन जोड्ने क्रममा सोमपालले २० र बसन्तले २४ रन बनाएपछि नेपालले २ सय रनको आँकडा पार गरेको थियो । ओपनर तथा उपकप्तान ज्ञानेन्द्र मल्लले सबैभन्दा बढी ३९ रन बनाए भने कप्तान पारस खड्काले ३० रन जोडे । ६३ बल खेलेका ज्ञानेन्द्रले ५ चौथा र पारसले २८ बलमा २ चौका र १ छक्का प्रहार गरे ।
शरद भेषावकरले ५ चौकासहित २७, सागरले २६, राजु रिजालले २ चौकाका साथ २४ रन बनाएका थिए । सिए बारेटी र केपी डुचीकाले समान २ तथा एक क्लार्क, एमएस रिनगोल्ड, सिटी पेरेनले १÷१ विकेट लिए ।
नेपाल र बेलायतको दौत्य सम्बन्ध स्थापित भएको २ सय बर्ष पुरा भएको उपलक्ष्यमा लर्डसमा मैत्रीपूर्ण खेल आयोजना गरिएको थियो । यो सँगै नेपाली टोलीले इङ्ल्यान्डको यात्रा अपराजित रहँदै टुंगाएको छ । एमसिसीअघि स्थानिय क्लबहरुसँगको ४ खेलमा पनि नेपाली विजयी भएको थियो । यसै महिनाको अन्त्यमा विश्व लिग क्रिकेट च्याम्पियनसिपअन्तर्गत नेदरल्यान्ड्सविरुद्ध दुई खेल खेल्दैछ । नेपाली टोली स्वदेश फर्केर साउन २९ र ३१ गते दुई खेल खेल्न नेदरल्यान्ड्स जानेछ ।