एजेन्सी – न्युजिल्यान्डसँगको दोस्रो तथा अन्तिम टेष्ट खेलमा भारतले कमजोर प्रर्दशन गरेको छ । शनिबार क्राइस्टचर्चमा बिहान टस हारेर ब्याटिङ थालेको भारत पहिलो इनिङमा ६३ ओभरमा २ सय ४२ रनमा समेटियो ।

ओपनर पृथ्वी शाले ६४ बलमा ८ चौका र १ छक्का सहित ५४ रन जोड्दै राम्रो सुरुवात दिलाए । तर काइल जेमिसनको बलमा टम लाथमले एक हातले उत्कृष्ट क्याच लिदै शालाई पेभिलिएन फर्काए । ओपनर मयंक अग्रवाललाई ट्रेन्ट बोल्टले छैटौं ओभरको चौथो बलमा ७ रनमा एलबिडब्लू आउट गरे ।

२५ औं ओभरको पहिलो बलमा टिम साउथीले कप्तान विराट कोहलीलाई ३ रनमा एलबिडब्लू आउट गरे । अजिंक्या रहाने ७ रनमा आउट हुन पुगे । पाँचौ विकेटका लागि हनुमा विहारी र चेतेश्वर पुजाराले ८१ रनको साझेदारी गर्दै भारतको इनिङ उकासेका थिए ।

तर विहारीलाई निल वाग्ररले विकेटकिपर बिजे वाटलिङबाट ५५ रनमा क्याच आउट गराएपछि भारतले निरन्तर विकेट गुम्न पुग्यो । विहारीले ७० बलमा १० चौका प्रहार गरे । चेतेश्वर पुजारा १ सय ४० बलमा ६ चौका सहित ५४ रनमा आउट भए । ऋषभ पन्त १२, रविन्द्र जडेजा ९, मोहम्मद शामी १६ रनमा आउट हुँदा जस्प्रित बुमराह १० रनमा नट आउट रहे ।

न्युजिल्यान्डका काइल जेमिसनले १४ ओभरमा ३ मेडन सहित ४५ रन खर्चेर ५ विकेट लिए । टिम साउथी र ट्रेन्ट बोल्टको नाममा २–२ विकेट रह्यो ।

पहिलो इनिङ थालेको न्युजिल्यान्डले पहिलो दिनको समाप्तीमा २३ ओभरमा ६३ रन जोड्न कुनै विकेट गुमाएको छैन । ओपनर टम लाथम २७ र टम ब्लन्डेल २९ रनमा अविजित छन् । सग्रमा न्युजिल्यान्ड १ सय ७९ रनले पछि छ ।