काठमाडौं (हाम्रो खेलकुद) – आगामी संस्करणको एभरेष्ट प्रिमियर लिग (इपिएल) को लागि चितवन टाइगर्सले सिंगापुरबाट खेल्दै आएका अष्ट्रेलियन नागरिक तथा युवा ब्याट्सम्यान टिम डेविडलाई टोलीमा भित्र्याएको छ ।

त्यस्तै चितवनले इंग्लयान्डका अलराउन्डर जेम्स फुलरलाई पनि टोलीमा अनुबन्ध गरेको छ । योसँगै चितवनबाट इपिएल खेल्ने चारै विदेशी खेलाडीको टुङ्गो लागेको छ । चितवनले यस अघिनै टोलीमा अफगानिस्तानका ओपनर मोहम्मद शाहजाद र आयरल्यान्डका पल स्टर्लिङलाई टोलीमा अनुबन्ध गरि सकेको छ ।

टिम डेविडले १२ टि ट्वान्टी आईमा ४ सय ८ रन बनाएका छन् । जसमा ३६ चौका र १७ छक्का सामेल छ । डेविडले गत जुलाईमा घरेलु मैदानमा भएको आईसीसी टि२० एसिया रिजन छनोटमा नेपाललाई ८२ रनले पराजित गर्न ४३ बलमा ८ चौका र ३ छक्का सहित ७७ रन जोड्दै म्यान अफ द म्याच चुनिएका थिए । जुन उनको टि ट्वान्टी आईको उच्च प्रर्दशन समेत हो ।

त्यस्तै डेविडले ५ लिष्ट ए र २४ टि ट्वान्टी एस खेलेका छन् । अष्टेलियाको टोलीमा नपरेपछि उनी गत वर्ष सिंगापुरबाट खेल्ने निर्णय लिएका थिए । उनले उमेर समुहमा अष्ट्रेलियाबाट नै खेलेका थिए । उनी बिग ब्यास लिग पर्थ स्कोचर्सबाट खेल्ने गर्दछन् । डेविड आक्रामक ब्याटिङका लागि परिचित छन् ।

जेम्शले इंग्ल्यान्ड लायन्स, न्युजिल्यान्ड यू१९ लगातका विभिन्न टोलीबाट खेलेका छन् । ५३ प्रथम श्रेणीमा उनले १२ सय ३९ रन बनाउनुको साथै १ सय ५० विकेट लिएका छन् । तीब्र गतिका बलर जेम्शले ८९ टि२० खेलमा ६ सय ३९ रन बनाउनुको साथै ९६ विकेट लिएका छन् । जसमा ६–२८ उत्कृष्ट प्रर्दशन छ ।

चितवनमा सोमपाल कामी, सन्दीप सुनार, साहब आलम, दीलिप नाथ, ललित भण्डारी, कमल सिंह ऐरी, भिम सार्की, सागर ढकाल, आदिल खान, ईशान पाण्डे र खड्क बोहरा स्वदेशी खेलाडीको रुपमा छन् ।