काठमाडौं (हाम्रो खेलकुद) – लेग स्पिनर सन्दीप लामिछानेले उत्कृष्ट बलिङ गरेसँगै नेपालले एसीसी इस्टर्न रिजन टि२० क्रिकेट प्रतियोगितामा मलेसिया विरुद्ध उत्कृष्ट प्रर्दशनलाई निरन्तरता दिएको छ ।

थाईल्यान्डको बैंकक स्थित टेर्डथाई क्रिकेट मैदानमा टस जितेर ब्याटिङ रोजेको मलेसियाले ११ ओभरमा ३ विकेट गुमाउँदै ६७ रन जोडेको छ । लेग स्पिनर सन्दीप लामिछानेले तेस्रो ओभरको दोस्रो बलमा ओपनर विरनदीप सिंहलाई पवन सरार्फबाट ३ रनमा क्याच आउट गराउँदै आफ्नो टि ट्वान्टी करिअरको एक सय विकेट पुरा गरे । लगत्तै अर्को बलमा सन्दीपले खिजार हायतलाई पवनबाटै शुन्यमा क्याच गराउँदै उत्कृष्ट सुरुवात दिलाए ।

लगातार दुई विकेट गुमाएको मलेसियालाई तेस्रो विकेटका लागि ओपनर मोहम्मद अनवार अरुदीन र कप्तान अहमद फैजले ३८ रनको साझेदारी गर्दै इनिङ उकास्न खोजेका थिए । तर सन्दीपले नवौं ओभरको पाँचौ बलमा अरुदीनलाई पवनबाटै ३१ रनमा क्याच गराउँदै पेभिलिएन फर्काएका छन् । आक्रामक देखिएका अरुदीनले २९ बलमा ३ चौका र २ छक्का प्रहार गरे ।

मलेसियाका अहमद फैज २० र सैद अजिज ७ रनमा खेलि रहेका छन् । सन्दीपले ३ ओभरमा १० रन खर्चेर ३ विकेट लिई सकेका छन् । सन्दीपले १८ मध्य १२ बल डट राख्दै दबाब कायम गरेका छन् ।