काठमाडौं (हाम्रो खेलकुद)– एसीसी इस्टर्न रिजन टि२० क्रिकेट प्रतियोगितामा नेपालले मलेसिया विरुद्ध उत्कृष्ट सुरुवात गरेको छ ।

थाईल्यान्डको बैंकक स्थित टेर्डथाई क्रिकेट मैदानमा टस जितेर ब्याटिङ रोजेको मलेसियाले सुरुवाती ५ ओभरमा २ विकेट गुमाउँदै २८ रन जोडेको छ । लेग स्पिनर सन्दीप लामिछानेले तेस्रो ओभरको दोस्रो बलमा ओपनर विरनदीप सिंहलाई पवन सरार्फबाट ३ रनमा क्याच आउट गराउँदै आफ्नो टि ट्वान्टी करिअरको एक सय विकेट पुरा गरे ।

लगत्तै अर्को बलमा सन्दीपले खिजार हायतलाई पवनबाटै शुन्यमा क्याच गराउँदै नेपाललाई उत्कृष्ट सुरुवात दिलाएका छन् । क्रिजमा ओपनर मोहम्मद अनवार अरुदीन १६ र कप्तान अहमद फैज ७ रनमा खेलि रहेका छन् । अरुदीनले १६ बलमा २ चौका र १ छक्का प्रहार गरेका छन् ।

त्यसअघि थाईल्यान्डको बैंकक स्थित टेर्डथाई क्रिकेट मैदानमा भएको टसमा मलेसियाका कप्तान मोहमद फैजले टस जितेर पहिला ब्याटिङ गर्ने निर्णय लिएका हुन् । दुवै टोली प्रतियोगितामा विजयी सुरुवात गर्ने सोचमा रहेका छन् । हङकङसँगको पाँच टि ट्वान्टी सिरिज क्लिनस्विप गरेको मलेसियाको मनोबल उच्च छ । मलेसिया त्यहि लयलाई निरन्तरता दिदै नेपालमाथि आश्चर्यजनक नतिजा निकाल्न चाहान्छ ।

ज्ञानेन्द्र मल्लको कप्तानीमा मैदान उत्रने नेपाल विगतको जस्तै मलेसियामाथि सहज जितको प्रयास गर्ने छ । पछिल्लो समय मलेसियाले नेपाललाई बलियो चुनौती दिदै आएको छ । मलेसियासँगको तीन टि ट्वान्टी आई खेलमा नेपालले सबैमा जित हात पारेको छ । पहिलो खेलमा आयोजक थाईल्यान्डलाई ४३ रनले पराजित गर्दै सिंगापुरले विजयी सुरुवात गरेको छ ।

नेपालको प्लेइङ ११ :

ज्ञानेन्द्र मल्ल (कप्तान), दीपेन्द्र सिंह ऐरी, पारस खड्का, विनोद भण्डारी, आरिफ शेख, करण केसी, सन्दीप लामिछाने, अभिनाश बोहरा, कुशल मल्ल, सुशन भारी र पवन सरार्फ ।

बेन्च : भुवन कार्की, किशोर महतो र सन्दीप जोरा ।