काठमाडौं (हाम्रो खेलकुद) – राष्ट्रिय क्रिकेट टोलीका प्रशिक्षक जगत टमाटाले थाईल्यान्डमा हुने एसीसी इस्टर्न रिजन टि ट्वान्टी क्रिकेट प्रतियोगितामा युवा बायाँ हाते अलराउन्डर कुशल मल्लले ओपनिङ गर्न सक्ने सम्भावना रहेको र त्यसै अनुसार तयार पनि पारेको बताएका छन् ।

‘समग्रमा तयारी राम्रै भयो । हामी मानसिक रुपमा बलियो र तयार छौं । नेपालको लक्ष्य उपाधि जित्ने हो । च्याम्पियन जस्तै खेल्ने छौं र च्याम्पियन बनेर फर्किने छौं’, टमाटाले भने । उपाधिको प्रमुख दावेदार तथा घरेलु टोली ओमान वेस्टर्न रिजनको समुह चरणबाटै बाहिरिएको छ । वेस्टर्न रिजनको नतिजाबाट नेपाल सचेत रहनु पर्ने देखिन्छ नि भन्ने प्रश्नमा टमाटाले भने, ‘क्रिकेटमा हार जित हुन्छ । विशेष त मानसिक रुपमा भरपर्छ । हामी सकरात्मक छौं । टि ट्वान्टीमा कसैलाई पनि कमजोर भन्न मिल्दैन, हामीले शत प्रतिशत दिने छौं ।’

टमाटाले राष्ट्रिय प्रशिक्षकमा ९ महिनापछि पुनरागमन गरेका छन् । भारतीय प्रमुख प्रशिक्षक उमेश पटवालले अकस्मात राजिनामा दिएपछि नेपाल क्रिकेट संघ (क्यान) ले टमाटालाई प्रशिक्षकको जिम्मेवारी दिएको हो । ‘सर्वप्रथम टोलीमा पुन मौका दिएकोमा क्यानलाई धन्यवाद । टिमले पनि सहयोग गरेको छ । फेरि एक पटक च्याम्पियन बनाएर ल्याउने लक्ष्य छ’, टमाटाले भने ।

टमाटाले टोली सन्तुलन रहेको बताउछन् । ‘सबै खेलाडी प्रर्दशन गरेरै आएका छन् । युवा जोश हुँदा फिल्डिङमा पनि फाइदा पुग्ने छ, ‘त्यसैमा टमाटाले थपे, ‘कुशलको ओपनिङको पनि सम्भावना छ । थाईल्याण्ड पुगेपछि त्यहाँको अवस्था हेरेर कुशलले ओपनिङ गर्ने नगर्ने टिम व्यवस्थापनले निर्णय लिनेछ । कुशललाई ओपनिङको लागि तयारी पारिरहेका छौं ।’