एजेन्सी – पुर्व कप्तान पारस खड्काले अन्तर्राष्ट्रिय क्रिकेट परिषद (आईसीसी) को नयाँ टि ट्वान्टी वरियताअन्तर्गत अलराउन्डरतर्फ सुधार गरेका छन् ।

विहीबार आईसीसीले सार्वजनिक गरेको नयाँ टि ट्वान्टी वरियता अन्तर्गत अलराउन्डरतर्फ पारस खड्काले एक स्थान सुधार गर्दै २६ औं स्थानमा उक्लिएका छन् । त्यस्तै करण केसी अलराउन्डरतर्फ ७४ र सोमपाल कामी ६६ औं स्थानमा यथावत छन् ।

बलिङतर्फ स्पिनर सन्दीप लामिछानेले दुई स्थान खस्किदै ८६ औं स्थानमा पुगेका छन् । ब्याटिङतर्फ भने पारस एक स्थान खस्किदै ६३ औं स्थानमा पुगेका छन् ।

ब्याटिङतर्फ पाकिस्तानका ओपनर बाबर आजम शीर्ष, भारतीय लोकेश राहुल दोस्रो र अस्ट्रेलिया कप्तान आरोन फिन्च तेस्रो स्थानमा यथावत छन् । बलिङतर्फ अफगानिस्तानका स्पिनर राशिद खानन शीर्ष स्थानमा यथावत छन् ।

अफगानिस्तानका मुजिव उर रहमान दोस्रो, अस्ट्रेलियाका स्पिनर एडम जम्पा तेस्रो स्थानमा छन् । त्यस्तै स्पिनर एस्टन एगर चौथो स्थानमा उक्लिएका छन् । पाँचौ स्थानमा दक्षिण अफ्रिका स्पिनर तरबेज शम्सी रहेका छन् ।

अलराउन्डरतर्फ अफगानिस्तानका अलराउन्डर मोहम्मद नाबी शीर्ष स्थानमा छन् । जिम्बावेका सेन विलियम्स दोस्रो स्थानमा उक्लिदा अस्ट्रेलियाका ग्लेन म्याक्सवेल तेस्रो स्थानमा पुगेका छन् । अलराउन्डरतर्फ यूएईका रोहन मुस्तफा पाँचौ र ओमानका खावर अली छैटौं स्थानमा छन् ।