काठमाडौं (हाम्रो खेलकुद) – बेलायत भ्रमणमा रहेको नेपाली टोलीको वास्तविक परिक्षा आजको खेलमा हुँदैछ । स्थानिय क्लबहरुसँगको ४ मा सबै अभ्यास खेल जितेको नेपालले आज मेरिलेबर्न क्रिकेट क्लब (एमसिसी) सँग लड्स मैदानमा प्रतिस्पर्धा गर्नेछ । नेपाल र बेलायतबीचको दौत्य सम्बन्ध स्थापनाको २ सय वर्ष पुगेको उपलक्ष्यमा एक दिवसिय खेल खेल्न लागेको हो ।

फाइल फोटो ।

खेललाई लिएर नेपाली टोली उत्साहित रहेको कप्तान पारस खड्काले बताएका छन्, ‘सबै उत्साहित छौं । हामी मैत्रीपूर्ण खेलका लागि मात्र होइन,नेदरल्यान्डस्सँगको खेलको तयारीका लागि पनि आएका हौं । त्यसले हाम्रो उत्कृष्ट ११ उत्रनेछ, ’ पारसले भने, ‘ हामी निकै उत्सुकतापूर्वक प्रतिक्षा गरिरहेका छौं । हामी सबै सतप्रतिसत दिएर खेल्नेछौं । यहाँ खेल्नु सपना पुरा भए बराबर हो । हामी यो दिनको प्रतिक्षामा थियौं । यो इतिहास खेल हो । लड्समा क्षमता देखाउने यो हाम्रो लागि राम्रो मौका हो । ’ यसै महिनाको अन्त्यमा नेपालले विश्व क्रिकेट लिग च्याम्पियनसिपमा नेदरल्यान्ड्सको सामना गर्दैछ । साउन २९ र ३१ गते दुई खेल नेदरल्यान्ड्समा हुनेछ । बेलायत भ्रमणबाट फर्केपछि नेपाली टोली नेदरल्यान्ड्स पुग्नेछ ।
पारसले लड्समा खेल्ने अवसर मिल्नुलाई नेपाली क्रिकेटलाई विश्व सामू देखाउने अवसरका रुपमा हेरेका छन् । दुई बर्षअघि ट्वान्टी २० विश्वकपमा नेपाली टोलीको नेतृत्व गरिसकेका पारसले भने, ‘ विश्व स्तरमा नेपाली क्रिकेटलाई प्रस्तुत गर्ने अवसरका रुपमा हामीले लिएका छौं । हामीले राम्रो खेल्नु पर्छ । एमसिसीले पक्कै पनि राम्रो खेल्छ । दुवै टोली जित्नका लागि खेल्नेछन् । यो मौका लागि हामी खुसी र गौरवान्वित छौं । लड्समा सधै खेल्ने अवसर जुट्दैन । नेपाली क्रिकेटमा आबद्ध सबैका लागि यो विशेष दिन हो । समग्र नेपाली खेलकुदकै लागि पनि यो महत्वपूर्ण दिन हो । ’ नेपाली टोलीका प्रशिक्षक जगत टमाटाले पनि मैत्रीपूर्ण खेलका रुपमा नभै प्रतिस्पर्धात्मक खेलका रुपमा लिएको बताए ।