काठमाडौं (हाम्रो खेलकुद) – स्पिनर अरियो पौडेलको उत्कृष्ट बलिङमा हिमालय क्रिकेट लिग यू१९ दुई दिवसिय प्रतियोगितामा आयोजक वाई वाई ग्रेट हिमालय क्रिकेट एकेडेमी फाइनलमा पुगेको छ ।

बुधबार नेक्सस क्रिकेट एकेडेमीलाई ६३ रनको इनिङ अन्तरले पराजित गर्दै ग्रेट हिमालय फाइनलमा प्रवेश गरेको हो । माथिल्लो मुलपानी क्रिकेट मैदानमा जारी प्रतियोगितामा नेक्सस पहिलो इनिङमा २४ ओभरमा ४० रनमा अल आउट भएको थियो । नेक्ससका कृश कार्कीले १४ रन बनाउन बाहेक अन्यले दोहोरो अंकमा रन छुन सकेनन् । ग्रेट हिमालयका मोहम्मद हुसेनले ५, सोनु देवकोटा र राशीद खानले २-२ विकेट लिए । अरियो पौडेलको नाममा १ विकेट रह्यो ।

पहिलो इनिङमा ग्रेट हिमालयले ५१ ओभरमा २२०-८ को अवस्थामा इनिङ समाप्तीको घोषणा गर्यो । जसक्रममा ग्रेट हिमालयले १ सय ८० रनको अग्रता कायम गरेको थियो । ग्रेट हिमालयका कप्तान आशिफ शेख ५१ र प्रशान्त सिंहले ५० रनको अर्ध शतकीय इनिङ खेले । नेक्ससका स्पिनर नरेन साउदले ६ विकेट लिए ।

दोस्रो इनिङमा नेक्सस ४२ ओभरमा १सय १७ रनमा अल आउट भएपछि ग्रेट हिमालय इनिङ अन्तरको जित सहित फाइनलमा पुगेको हो । नेक्ससका विशाल विक्रम केसी १८, महेश राना २३, उत्तम थापा १६ रनमा आउट हुँदा कृश कार्की २३ रनमा अविजित रहे । ग्रेट हिमालयका अरियो पौडेलले १८ ओभरमा ८ मेडन सहित २९ रन खर्चेर ८ विकेट लिए ।

ग्रेट हिमालयले उपाधिको लागि समुह ए को विजेतासँग प्रतिस्पर्धा गर्ने छन् । समुह एमा काठमाडौं क्रिकेट टेनिङ सेन्टर, ओसिस क्रिकेट एकेडेमी र वालुवाटार क्रिकेट एकेडेमी रहेका छन् । वालुवाटार दुबै खेलमा पराजित हुँदै उपाधि होडबाट बाहिरिसकेको छ ।