काठमाडौं (हाम्रो खेलकुद) –  राष्ट्रिय क्रिकेट टोलीका पूर्व प्रशिक्षक पुबुदु दासानायके  आइतबार नेपाल आउने भएका छन् ।

आगमी संस्करणको एभरेष्ट प्रिमियर लिग (इपिएल) को टोली भैरहवा ग्ल्याडियटर्सको प्रशिक्षक पुबुदु झण्डै एक महिना नेपालमा बस्ने छन् । भैरहवाका अनुसार उनी ट्यालेन्ट हन्टको लागि आइतबार बिहान नेपाल आई पुग्ने छन् ।

इपिएल सम्म उनी नेपालमै रहने छन् । इपिएल चैत्र १ देखी १५ सम्म टीयू क्रिकेट मैदानमा हुँदै छ । भैरहवाले ट्यालेन्ट हन्ट फागुन २२ मा भैरहवामा गर्दै छ । ट्यालेन्ट हन्टबाट पुबुदुले खेलाडी छनोट गर्ने छन् ।

ग्ल्याडियर्टसले गत भदौंमा पुबुदुलाई प्रशिक्षकमा नियुक्त गरेको थियो । शरद भेषावकर कप्तान रहेको भैरहवा गत वर्षको उपविजेता टोली समेत हो । भैरहवाले वेस्ट इन्डिजका अलराउन्डर ड्वेन स्मिथलाई टोलीमा अनुबन्ध गरि सकेको छ ।

भैरहवामा शरदसँगै, प्रदीप ऐरी, मोहम्मद आरिफ शेख, कृष्ण कार्की, भुवन कार्की, दीपेश श्रेष्ठ, रोहित कुमार पौडेल, हरि शंकर झा, अभिनाश बोहरा, कुशल मल्ल, विकास आग्री र हिमान्शु दत्त खेलाडी छन् ।

सन् २०११ मा पुबुदु नेपाली टोलीको प्रमुख प्रशिक्षकमा नियुक्त भएका थिए । उनको प्रशिक्षकमा नेपालले डिभिजन ४, ३, २ को उपाधि जित्नुका साथै २०१४ को टि२० विश्वकप पनि खेलेको थियो ।

जुन विश्वकपलाई नेपाली क्रिकेटकै इतिहासकै सर्वाधिक ठूलो सफलता मानिन्छ । नेपाल क्रिकेट संघ (क्यान) को बारम्बार आन्तरिक किचलोको कारण पुबुदुले आफ्नो भविष्य नदेखेपछि सन् २०१५ मा प्रशिक्षक पद छाडेर अमेरिका गएका थिए ।