काठमाडौं (हाम्रो खेलकुद) – एभरेस्ट प्रिमियर लिगको साविक विजेता टोली ललितपुर प्याट्रीयट्सले मार्च तेस्रो साता सुरु हुने प्रतियोगिताका लागि तीन पाकिस्तानी खेलाडी अनुबन्धन गरेको छ ।

यसअघि नै श्रीलंकाली ब्याट्सम्यान उपुल थारंगालाई अनुबन्धन गरेको ललितपुरले थप तीन विदेशी खेलाडी अनुबन्ध गरेको हो । अलराउन्डरद्वय हमाद आजम र हसन खानसँगै बायाँहाते पेस बलर मिर हाम्जाले ललितपुरको जर्सीमा उत्रनेछन् । गत सिजन भैरहवा ग्ल्याडीयटर्सलाई पराजित गर्दै उपाधि जितेको ललितपुर यसपटक उपाधि रक्षा गर्ने लक्ष्यमा छ ।

मिर हाम्जाले गत सिजन ससेक्सबाट काउन्टी खेलेका थिए । हसन खानले लगातार पीएसएल खेल्दै आएका छन् भने क्यानाडामा सम्पन्न ग्लोबल टि२० मा पनि उनले एडमन्टन रोयल्समा थिए । उनी सन् २०१८ मा यू-१९ विश्वकपमा पाकिस्तानका कप्तान समेत रहेका थिए । हमाद आजमले पनि घरेलु क्रिकेटमा उत्कृष्ट प्रदर्शन गर्दै २०१९ को पाकिस्तान कपमा उत्कृष्ट अलराउन्डर घोषित भएका थिए ।

ईपीएलको नियमअनुसार १६ खेलाडीको सुचिमा कम्तिमा ३ विदेशी खेलाडी हुनुपर्ने प्रावधान रहेको छ । राष्ट्रिय टोलीका कप्तान समेत रहेका ज्ञानेन्द्र मल्लले टोलीको नेतृत्व सम्हाल्नेछन् । टोलीको प्रशिक्षकमा राजु बस्न्यात नै रहनेछन् ।