एजेन्सी – पाहुना टोली भारतले न्युजिल्यान्डविरुद्ध पहिलो टेस्टको पहिलो दिन कमजोर सुरुवात गरेको छ । टस हारेपछि पहिलो ब्याटिङको निम्तो पाएको भारत दिनको खेल सकिंदा १२२-५ को स्थितिमा छ ।

ओपनर पृथ्वी शाले आक्रामक सुरुवात दिलाएपनि पाँचौ ओभरको दोस्रो बलमा उनी टिम साउथीको बलमा बोल्ड हुन पुगे । उनले १८ बलमा २ चौका प्रहार गर्दै भारतले जोडेको सम्पूर्ण १६ रन जोडेका थिए । अर्का ओपनर मयंक अग्रवाल र चेतेश्व्र पुजाराले त्यसपछि सम्हालिएर ब्याटिङ गर्ने प्रयास गरेका थिए ।

डेब्यु गरिरहेका तीव्र गतिका बलर काइल जेमिसनले पुजारालाई आफ्नो शिकार बनाए । १६ औं ओभरमा पुजारा विकेटकिपर बिजे वाटलिङको हातबाट समातिए । पुजाराले ४२ बलमा १ चौकासहित ११ रन जोडे । कप्तान विराट कोहली पनि लामो समय टिकेनन् । जेमिससनले लगत्तै अर्को ओभरमा कोहलीलाई पहिलो स्लिपमा रस टेलरको हातबाट क्याचआउट गराए । कोहली मात्र २ रन जोड्दै पेभेलियन फर्किए ।

क्रिजमा आएका अजिंक्या रहाने र अग्रवालले त्यसपछि ४८ रनको साझेदारी गरे । ओपनर अग्रवाल ट्रेन्ट बोल्टको बलमा आक्रामक सट प्रहार गर्ने क्रममा एज लाग्दै जेमिसनको हातबाट समातिए । त्यसपछि आएका हनुमा बिहारी पनि मात्र ७ रन जोड्दै जेमिसनको बलमा कट बिहाइन्ड भए ।

क्रिजमा भारतका लागि रहाने ३८ रनमा खेलिरहेका छन् । उनलाई विकेटकिपर ऋषभ पन्तले १० रनमा साथ दिइरहेका छन् । वर्षका कारण पहिलो दिन ५५ ओभरको खेल मात्र सम्भव भएको छ । अब दोस्रो दिन ९८ ओभरको खेल हुनेछ ।