एजेन्सी – न्युजिल्यान्डका सर्वाधिक अनुभवी ब्याट्सम्यान रस टेलरले विश्व क्रिकेट जगतमा नयाँ इतिहास रच्दै छन् । शुक्रबार भारतसँग हुने पहिलो टेष्ट खेलसँगै टेलरको नाममा नयाँ कीर्तिमान बन्नेछ ।

शुक्रबार भारतसँग टेष्ट खेल्दा अन्तर्राष्ट्रिय क्रिकेट परिषद (आईसीसी) को टेष्ट, ओडीआई र टि ट्वान्टी गरि तीनै फर्म्याट क्रिकेटमा एक सय खेल खेल्ने टेलर पहिलो खेलाडी बन्दै छन् । हालसम्म टेलरले ९९ टेष्ट, २ सय ३१ ओडीआई र १ सय टि ट्वान्टी आई खेलेका छन् । टेलरले टेष्टमा दक्षिण अफ्रिकाविरुद्ध सन् २००७ मा डेब्यु गरेका थिए । सन् २००६ मा वेस्ट इन्डिजविरुद्ध ओडीआई र श्रीलंकाविरुद्ध टि ट्वान्टी आईमा डेब्यु गरेका थिए ।

‘विश्व क्रिकेटमा थुप्रै राम्रा क्रिकेटर छन् । म पहिला तीनै खेलमा १ सय खेल खेल्ने पहिला खेलाडी बन्छु भने त्यो धेरै राम्रो हुने छ’, टेलरले भनेका छन् ।

टेलर पछिल्लो समय उत्कृष्ट लयमा छन् । भारतसँगको पहिलो ओडीआई खेलमा ३ सय ४८ रनको लक्ष्य पुरा गर्न टेलरले १ सय ९ रनको अविजित शतकीय इनिङ खेल्दै ‘प्लेयर अफ द म्याच’ चुनिएका थिए । त्यस्तै उनले भारतविरुद्ध दोस्रो ओडीआईमा ७३ रनमा अविजित रहँदा तेस्रो खेलमा १२ रनको योगदान दिएका थिए ।

भारतसँगको ओडीआई सिरिज ३–० ले जित्दा टेलर ‘म्यान अफ द सिरिज’ चुनिएका थिए । त्यस्तै भारतसँगको पाँच टि ट्वान्टी सिरिजमा टेलरले उत्कृष्ट प्रर्दशन गरेपनि टोलीमा फिनिसरको कमि हुँदा क्लिनस्वीपको शिकार बन्न परेको थियो ।