काठमाडौं (हाम्रो खेलकुद) – छटौं संस्करणको माछापुच्छ्रे बैंक कर्पोरेट सुपर सिक्सेस प्रतियोगिताको उपाधि कामना सेवा विकास बैंकले जितेको छ । बुधबार टीयू क्रिकेट मैदानमा भएको फाइनलमा भारतीय राजदूतावासलाई ८ रनले पराजित गर्दै कामना सेवा विकास बैंकले पहिलो पटक उपाधि जितेको हो ।

जितका लागि ६३ रनको लक्ष्य पछ्याएको राजदूतावासले ५ ओभरमा ५४ रन मात्र बनाउन सक्यो। भारतीय राजदूतावासका सुभास सिंहले २८ तथा निरज कुमार सिंहले ११ रन बनाए । कामना सेवा विकास बैंकका हेमन्त श्रीवास्तव, केशव गिरि र घनश्याम ढुंगेलले समान १-१ विकेट लिए ।

टस जितेर पहिला ब्याटिङ थालेको कामना सेवा विकास बैंकले ५ ओभरमा ५ विकेट गुमाएर ६२ रन बनाएको थियो । कामनाका हेमन्त श्रीवास्तवले सर्वाधिक ३३ रन बनाए जुन क्रममा १७ बलमा ५ चौका र १ छक्का प्रहार गरे। सुरेश उप्रेतीले १३ रन बनाए ।

भारतीय राजदूतावासका बलर निरज सिंहले १ विकेट लिए । यस अघि सम्पन्न पहिलो सेमीफाइनलमा भारतीय राजदूतावासले एनसेल ए लाई १९ रनले पराजित गरेको थियो । यस्तै कामना सेवा विकास बैंकले सिभिल बैंकलाई १५ रनले पराजित गरेको थियो ।

फाइनल खेलको प्लेयर अफ द म्याच कामना सेवा विकास बैंकका हेमन्त श्रीवास्तव चुनिए। प्रतियोगिताको उत्कृष्ट खेलाडी कामना सेवा विकास बैंकका हेमन्त श्रीवास्तव चुनिए । प्रतियोगिताभर कुल २ सय ५ रन बनाउनुको साथै ४ विकेट लिए।

यस्तै उत्कृष्ट बलर प्राइम कमर्सियल बैंकका विवेक दली चुनिए। उत्कृष्ट ब्याट्सम्यान सेन्चुरी बैंकका सुरज तिमिल्सिना चुनिए। उत्कृष्ट किपर भारतीय राजदूतावासका राजेश चौधरी तथा उत्कृस्ट फिल्डर प्राइम कमर्सियल बैंकका विवेक दली चुनिए ।

फेयर प्ले अवार्ड नेपाल राष्ट्र बैंकले प्राप्त गर्यो । प्रतियोगिताका सर्वाधिक छक्का प्रहार गर्ने खेलाडी सेन्चुरी बैंकका सुरज तिमिल्सिना रहे । प्रतियोगिताको विजेताले ट्रफीसहित आकर्षक गिफ्टका साथै अर्को वर्षको प्रतियोगितामा निःशुल्क प्रवेश पाएका छन् ।

उपविजेताले पनि ट्रफीसँगै गिफ्ट ह्याम्पर प्राप्त गरे । प्रतियोगिताको सर्वोत्कृष्ट खेलाडीले मोटरसाइकल, उत्कृष्ट ब्याट्सम्यान, बलर, फिल्डर, विकेट किपर, सर्वाधिक छक्का प्रहार गर्ने खेलाडीहरुले ट्रफी र गिफ्ट ह्याम्पर प्राप्त गरे ।