काठमाडौं (हाम्रो खेलकुद) – हिमालय क्रिकेट लिगमा बुधबार वालुवाटार क्रिकेट क्लबका दिनेशजंग बुढामगर र ओसिस क्रिकेट एकेडेमीका सचिन शर्माले उत्कृष्ट शतक प्रहार गरेका छन् । बुधबार मुलपानी क्रिकेट मैदानमा टस हारेर ब्याटिङको निम्तो पाएको वालुवाटारले ५० ओभरमा २ सय ६५ रन बनाउन ९ विकेट गुमाएको अवस्थामा पहिलो इनिङ समाप्तीको घोषणा गर्यो ।

वालुवाटरका दिनेशजंग बुढामगरले १ सय २ बलमा १७ चौका र ४ छक्का सहित १ सय २८ रनको शतकीय इनिङ खेले । ओपनर अभिनाश सिंह ४५, प्रशान्त पन्डित १५, नविन तामाङ २६, आयुष पौडेल १२ र पुजन गुरुङ ११ रनमा आउट भए । ओसिसका स्वरुप श्रेष्ठले ५, सचिन शर्मा २, सुमित श्रेष्ठ र रोशन पुलामीले १-१ विकेट लिए ।

पहिलो दिनको खेल सकिदा ओसिसले ५३ ओभरमा ३ सय ६४ रन जोड्न ६ विकेट गुमाएको छ । उसका सचिन शर्मा १ सय ३ बलमा १९ चौका सहित १ सय १७ रनमा अविजित छन् । आशिफ झा ४५ बलमा १३ चौका सहित ६० रनमा आउट भए । त्यस्तै सोनु अन्सारीले ५४ बलमा ११ चौका र ३ छक्का सहित ७९ रनको आक्रामक इनिङ खेले ।

सन्दीप वस्नेत २३, रोशन पुलामी ११ रनमा आउट हुँदा सुमित श्रेष्ठ ६८ रनमा अविजित छन् । सातौं विकेटका लागि सुमित र सचिनले १ सय ५४ रनको शतीकय अविजित साझेदारी गरेपछि ओसिसले अग्रता लिएको छ । पहिलो दिनको समाप्तीमा ओसिस ९९ रनले अघि छ । वालुवाटारका सुरेश बस्नेत ३, नविन तामाङ २ र राजन जिसीले १ विकेट लिए ।