पोखरा (हाम्रो खेलकुद) – दिपक डुम्रेकको विष्फोटक शतकसँगै नवलपुरले गण्डकी प्रदेश स्तरीय यु –१६ एक दिवसिय क्रिकेट प्रतियोगितामा मंगलबार कास्की बीलाई २ सय ४५ रनले पराजित गरेको छ ।

पोखरा क्रिकेट एकेडेमीको आयोजनामा पोखरा रंगशालास्थित मैदानमा भएको खेलमा टस जितेर पहिले ब्याटिङ गरेको नवलपुरले ४५.२ ओभरमा सबै विकेट गुमाएर २ सय ८१ रन बनाएको थियो । २ सय ८२ रनको लक्ष्य पछ्याएको कास्कीलाई २१ ओभरमा ३६ रन बटुल्दा अलआउट भएको थियो ।

नवलपुरका लागि दिपकले शतक पुरा गरे । प्रतियोगितामा शतक पुरा गर्ने उनी पहिलो खेलाडी बनेका छन् । १ सय ८ बलमा खेल्दै १४ चौका र २ छक्का प्रहार गरेका दिपकले १ सय २७ रन बनाएका थिए । त्यस्तै शदर तिवारिले ४९ रन बनाए । उनले ६४ बलमा ४ चौका प्रहार गरे ।

प्रमिश अर्यालले ७, प्रविन भुजेलले ६ रन, सुरज आचार्यले ९ रन र स्वीकार श्रेष्ठले ८ रन जोडे । कास्की बी को लागि दर्पण डागिले ७ ओभरमा ४० रन खर्चंदै ४ विकेट लिए । सुदिप भट्टराई,समिर लामिछाने र सुसान्त गिरीले समान २ विकेट लिए ।

नवलपुरका अगाडि कास्की बी निरिह रह्यो । कास्कीका ओपनर सफल श्रेष्ठ शुन्य रनमै पेभेलिय फर्किए भने अर्को ओपनर आकाश शर्मा ४ रनमा आउट भए । कास्कीको लागि सुशान्त गिरिले २४ रन बाहेक अन्य कुनैपनी ब्याट्म्यानले दोहोरो अकंमा रन जोड्न सकेनन् । सुशान्त ४७ बलमा ४ चौका प्रहार गरे ।

नवलपुरको लागि स्वीकार श्रेष्ठले ३ विकेट लिए । शुसिल क्षेत्री, सुरज आचार्य, अबिसान्त न्युरेले समान २ विकेट लिए । शतक बनाउने दिपक खेलको म्यान अफ दी म्याच घोषित भए ।