काठमाडौं (हाम्रो खेलकुद) – कप्तान आशिफ शेखको शतकमा वाईवाई ग्रेट हिमालय क्रिकेट एकेडेमीले यू१९ दुई दिवसिय हिमालय क्रिकेट लिगको पहिलो दिन वलियो अग्रता लिएको छ ।

पहिलो दिनको खेल समाप्तीमा ग्रेट हिमालयले क्रिकेट एकेडेमीले हिमालय क्रिकेट एकेडेमीविरुद्ध १ सय ६४ रनको अग्रता कायम गरेको छ । आइतबार मूलपानी क्रिकेट मैदानमा टस हारेर पहिले ब्याटिङ रोजेको हिमालय क्रिकेट एकेडेमी (एचसीए) ३४.१ ओभरमा १ सय ४४ रनमा अल आउट भएको थियो । एचसीएका रजत तिमल्सिनाले ३८ बलमा ८ चौका र १ छक्का सहित ४२ रनको सर्वाधिक इनिङ खेले ।

गजेन्द्र बोहराले १६, अमृत थापाले १४ , भुमिसिंह कुवँरले १६ र सन्दीप शाहीले २३ रन जोडे । बलिङतर्फ ग्रेट हिमालयका स्पिनर सोनु देवकोटाले ३, तीब्र गतिका वलर राशिद खान र मोहम्मद हुसेनले समान २-२ विकेट लिए । अरियो पौडेल र विवेक यादवको नाममा १-१ विकेट रह्यो ।

ग्रेट हिमालय पहिलो इनिङमा ६० ओभरमा ३ सय २० रनमा अल आउट हुन पुग्यो । ग्रेट हिमालयलाई बलियो योगफलमा पुर्याउन कप्तान आशिफ शेखले ९५ बलमा १७ चौका र १ छक्का सहित एक सय रनको शतकीय इनिङ खेले । त्यस्तै आयुश बस्नेतले ६९ र आयुशमान बमले ५३ अर्ध शतकीय योगदान दिदै बलियो योगफलमा पुर्याए । अशोक बस्नेतले ५२ रनको अर्ध शतकीय इनिङ खेले । सन्दीप शाहीले सर्वाधिक ४ विकेट लिए । कप्तान प्रतिश जिसीले २, गजेन्द्र बोहरा र दिपक बोहराको नाममा १-१ विकेट रह्यो ।

हिमालय क्रिकेट एकेडेमीले दोस्रो इनिङमा १२ रन जोड्दा पहिलो दिनको खेल सकिएको छ । यू १९ दुई दिवसिय शैलीको प्रतियोगिता माथिल्लो मुलपानी क्रिकेट मैदानमा फागुन १९ गते सम्म चल्ने छ । प्रतियोगितामा काठमाडौं क्रिकेट टेनिङ सेन्टर, वाईवाई ग्रेट हिमालय क्रिकेट एकेडेमी, हिमालय क्रिकेट एकेडेमी, ओसिस क्रिकेट एकेडेमी, वालुवाटार क्रिकेट एकेडेमी र नेक्सस क्रिकेट एकेडेमी गरि ६ टोलीको सहभागिता रहनेछ ।

पहिलो इनिङ ६० ओभरको हुने छ । पहिलो दिन कम्तिमा १ सय ५ ओभरको हुने छ । एक घण्टामा १५ ओभर गरिसक्नु पर्नेछ । हरेक खेलको विजेता टोलीले १० अंक प्राप्त गर्ने छन् । सँगै बोनस अंक पनि जोडिने छ । खेल बराबरीमा सकिएको अवस्थामा ५ अंक बाडिनेछन् । साथै इनिङको बोनस अंक जोडिने छ । खेल वर्षाको कारण रद्द भएको अवस्थामा दुवै समान २ अंक पाउने छन् । १ सय रन बराबर १ अंक हुने छ । प्रत्येक विकेटको ०.५ अंक हुने छ ।