काठमाडौं (हाम्रो खेलकुद) – विश्वव्यापी रुपमा फैलिरहेको कोरोना भाइरसका कारण तीन टोलीले सहभागिता नजनाउने भएपछि थाईल्यान्डमा हुने एसीसी इस्टर्न रिजन टि ट्वान्टी क्रिकेट छनोट प्रभावित बन्न पुगेको छ । यससँगै ५ टोलीको मात्र सहभागिता रहने प्रतियोगिताको पहिलो खेलमा नेपालले मलेसियासँग खेल्ने भएको छ ।

एसियन क्रिकेट काउन्सिलले सोमबार इस्टर्न रिजनको नयाँ खेल तालिका सार्वजनिक गरेको छ । भुटान, चीन र म्यानमारले कोरोना भाइरसको कारण प्रतियोगिताबाट नाम फिर्ता लिएका छन् । यी तीन टोलीले नाम फिर्ता लिएसँगै इस्टर्न रिजन अव लिगको आधारमा हुने छ । लिगपछि शीर्ष दुई टोली अगष्टमा मलेसियामा हुने एसिया टि ट्वान्टी क्वालिफयारको लागि छनोट हुने छन् ।

चीन, भुटान र म्यानमारले सहभागिता नजनाउने भएपछि प्रतियोगिता दुइ दिन पछि सरेको छ । अव नयाँ तालिका अनुसार इस्टर्न रिजन फागुन १७ देखी २३ गते सम्म (२९ फ्रेबअरी देखी ६ मार्च ) सम्म हुने भएको छ । इस्टर्न रिजनमा नेपाल सहित थाईल्यान्ड, हङकङ, सिंगापुर र मलेसियाबीच प्रतिस्पर्धा हुने छ । इस्टर्न रिजनको लागि नेपालले ज्ञानेन्द्र मल्लको कप्तानीमा १४ सदस्य टोली घोषणा गरि सकेको छ ।

नेपालको खेल तालिका

फागुन १७ : नेपालविरुद्ध मलेसिया

फागुन १८ : नेपालविरुद्ध हङकङ

फागुन २१ : नेपालविरुद्ध थाईल्यान्ड

फागुन २३ : नेपालविरुद्ध सिंगापुर

इस्टर्न र वेस्टन रिजनबाट छनोट भएर आउने शीर्ष दुई दुई टोली गरी चार टिमले अगष्टमा मलेसियामा एसिया टि ट्वान्टी क्वालिफयार खेल्ने छन् । जसको विजेताले सेप्टेम्बरमा पाकिस्तानमा हुने एसिया टि ट्वान्टी कप प्रतियोगितामा भारत, पाकिस्तान, बंगलादेश, श्रीलंका र अफगानिस्तानसँग खेल्न पाउने छ ।

इस्टर्न रिजनको लागि राष्ट्रिय क्रिकेट टोली :

ज्ञानेन्द्र मल्ल (कप्तान), दीपेन्द्र सिंह ऐरी (उप कप्तान), पारस खड्का, विनोद भण्डारी, आरिफ शेख, करण केसी, सन्दीप लामिछाने, अभिनाश बोहोरा, कुशल मल्ल, सुशन भारी, पवन सरार्फ, सन्दीप जोरा, भुवन कार्की, र किशोर महतो