काठमाडौं (हाम्रो खेलकुद) – प्रशिक्षक उमेश पटवालले जिम्मेवारी छाडेसँगै रिक्त रहेको राष्ट्रिय क्रिकेट टोलीको प्रशिक्षकको जिम्मेवारी पूर्व प्रशिक्षक जगत टमाटाले सम्हाल्ने भएका छन् । भारतीय प्रशिक्षक पटवालले अमेरिका र ओमानसँगको त्रिकोणात्मक सिरिज पछि लागु हुनेगरि दुई हप्ताअघि नै राजिनामा दिएका थिए ।

नयाँ विदेशी प्रशिक्षक नियुक्त नहुन सम्म जगत टमाटाले नै जिम्मेवारी सम्हाल्ने नेपाल क्रिकेट संघ (क्यान) का सचिव अशोकनाथ प्याकुरेलले बताएका छन् । उमेश पटवालको राजिनामा केहि दिनमा नै स्वीकृती भएर आधिकारिक रुपमा आउने क्यानले जनाएको छ । पटवालको राजिनामासँगै नेपालको सिनियर प्रशिक्षकको हिसाबमा टमाटाले नै हेर्ने प्याकुरेलले बताए ।

‘यसअघि पटवाल १५ दिन भारत बस्दा पनि टमाटाले नै टोली हेर्नुभएको थियो । वहाँ अहिले पनि टोलीमा हुनुहुन्छ । बन्द प्रशिक्षणमा सहायक प्रशिक्षकले पनि साथ दिनेछन् । नयाँ विदेशी प्रशिक्षक नआउँदासम्म उहाँले नै हेर्नुहुनेछ,’ प्याकुरेलले भने । त्यस्तै क्यानले विदेशी प्रशिक्षकको लागि आफ्नो तयारी अघि बढाइसकेको छ । कसलाई ल्याउने भन्ने बारे आन्तरिक गृहकार्य थालेको क्यानले जनाएको छ । यसअघि गत जेठमा पटवाल नियुक्त हुनुअघि सम्म प्रमुख प्रशिक्षकमा टमाटा रहेका थिए ।

अन्तर्राष्ट्रिय क्रिकेट परिषद् (आइसिसी) र राष्ट्रिय खेलकुद परिषद् (राखेप) ले पटवाललाई गत जेठमा राष्ट्रिय टोलीको प्रशिक्षक नियुक्त गरेको थियो । उनको सम्झौता अवधि एक वर्ष भएपनि उनले अगाडि नै राजीनामा दिएका थिए । उनको प्रशिक्षणमा नेपाली टोलीले सन्तोषजनक प्रदर्शन भने गर्न सकेको छैन । सिंगापुरमा टि ट्वान्टी विश्वकप छनोटको क्षेत्रिय छनोटबाटै बाहिरिदै नेपालले लज्जास्पदक प्रदर्शन गरेको थियो ।

टमाटाले सन् २०१५ मा तत्कालिन प्रशिक्षक पुवुदु दासानायकेले छोडेदेखि गत जेठसम्म नेपाली टोलीको प्रमुख प्रशिक्षकको रुपमा काम गरेका थिए । उनले आफ्नो प्रशिक्षकमा नेपाललाई एक दिवसिय विश्वकप छनोट हुँदै पहिलो पटक ऐतिहासिक ओडीआई मान्यता दिलाउन सफल भएका थिए । गत वर्ष यूएईमा भएको तीन ओडीआई र तीन एक दिवसिय ऐतिहासिक सिरिज जित्दा टमाटा प्रमुख प्रशिक्षक थिए ।

त्यसयता टमाटाले नेपाली राष्ट्रिय महिला टोली हेरेका थिए । टमाटाकै प्रशिक्षकमा महिला टोलीले सागमा कास्य जितेको थियो । टमाटाले अब फागुन तेस्रो सातादेखि थाईल्यान्डमा सुरु हुने तयारी रहेको एसीसी पुरुष इस्टर्न रिजन टि ट्वान्टी प्रतियोगिताको लागि नेपाली टोलीको लागि प्रशिक्षण दिनेछन् । इस्टर्न रिजनको लागि नेपालको १८ सदस्य टोली घोषणा गरिसकेको छ ।