काठमाडौं (हाम्रो खेलकुद) – नेपालले आईसीसी विश्वकप लिग २ त्रिकोणात्मक एकदिवसिय सिरिज अन्तर्गत बुधबार अन्तिम खेलमा अमेरिकाविरुद्ध पहिला फिल्डिङ गर्ने भएको छ।

टीयू क्रिकेट मैदान भएको टसमा कप्तान ज्ञानेन्द्र मल्लले टस जितेर फिल्डिङ गर्ने निर्णय लिएका हुन् । टोलीमा आज एक परिवर्तन भएको छ । ओमानविरुद्ध ४ ओभरमा २९ रन खर्चेका कमल सिंह ऐरीको स्थानमा स्पिनर ललित नारायण राजवंशीले स्थान पाएका छन् । जारी सिरिजमा ललितले पहिलो पटक मौका पाएका हुन् । नेपालले एकमात्र तीब्र गतिको बलर मैदान उतारेको छ । अमेरिकाले प्रमुख ब्याट्सम्यान स्टिभ टेलर र अलराउन्डर करिमा गोरलाईनै बाहिर राखेको छ ।

नेपालले पहिलो खेलमा अमेरिकालाई ३५ रनले हराएको थियो । ओमानसँग नेपाल १८ रन र ८ विकेटले पराजित भएको थियो । यता अमेरिका पनि ओमानसँग ६ विकेट र ९२ रनले पराजित हुन पुग्यो । अमेरिका अन्तिम खेलमा जित निकाल्दै घर फर्किन चाहन्छ । घरेलु टोली नेपाल अमेरिकामाथि लगातार दोस्रो जित निकाल्दै पहिलो घरेलु त्रिकोणात्मक सिरिज सुखद अन्त्य गर्ने प्रयासमा हुनेछ । ओमानले शत प्रतिशत जित निकाल्दै नेपाल भ्रमण अन्त्य गरेको छ ।

प्लेइङ ११ :

ज्ञानेन्द्र मल्ल (कप्तान), आरिफ शेख, दीपेन्द्र सिंह ऐरी, ललित नारायण राजवंशी, विनोद भण्डारी (विकेटकिपर), करण केसी, पारस खड्का, कुशल मल्ल, सुशन भारी, सुवास खकुरेल र सन्दीप लामिछाने

बेन्च :

रोहित कुमार पौडेल, अभिनाश बोहरा र कमल सिंह ऐरी