एजेन्सी – नेपाली लेग स्पिनर सन्दीप लामिछाने अनुबन्धित रहेको मेलबर्न स्टार्स बिग ब्यास लिगको फाइनलमा पुगेको छ । बिहीबार च्यालेन्जर खेलमा मेलबर्न स्टार्सले सिड्नी थन्डरलाई २८ रनले पराजित गर्दै फाइनलमा प्रवेश गरेको हो ।

मेलबर्न स्टार्सले प्रस्तुत गरेको १ सय ९५ रनको विजयी लक्ष्य पछ्याएको सिड्नी थन्डर २० ओभरमा ८ विकेटको क्षतिमा १ सय ६६ रन मात्रै बनाउन सक्यो । थन्डरका एलेक्स रोस ३८ बलमा ३ चौका र ३ छक्का सहित सर्वाधिक ५८ रनको योगदान दिए । ओपनर उस्मान खवाजा २३, एलेक्स हल्स ८, क्रिस मोरिस २१ र अर्जुन नायर ३० रनको योगदान दिए । तीब्र गतिका बलर हरिस रउफले ४ ओभरमा १७ रन खर्चेर ३ विकेट लिए । नाथन कुल्टर नाइल र एडम जम्पाको नाममा २-२ विकेट रह्यो ।

त्यसअघि मेलबर्न क्रिकेट मैदानमा टस जितेर ब्याटिङ थालेको मेलबर्न स्टार्सले निर्धारित २० ओभरमा २ विकेट गुमाउँदै १ सय ९४ रन बनाएको थियो । मार्कस स्टोइनिस र निक लरर्किनले समान ८३ रनको योगदान दिए । निक ४९ बलमा ९ चौका र ३ छक्का सहित अविजित रहे । उच्च लयमा रहेका स्टोइनिसलाई १७ औं ओभरको पाँचौ बलमा क्रिस मोरिसले बोल्ड आउट गरेका थिए । बोल्ड आउट हुनुअघि स्टोइनिसले ५४ बलमा ७ चौका र ३ छक्का प्रहार गरे ।

दोस्रो विकेटका लागि मार्कस स्टोइनिस र निक लरर्किनले १ सय १७ रनको शतकीय साझेदारी गर्दै विशाल योगफलमा पुर्याएका थिए । कप्तान ग्लेन म्याक्सवेल ४ रनमा अविजित रहे । क्रिस मोरिसले ४ ओभरमा ३० रन खर्चेर २ विकेट लिए । मेलबर्न स्टार्स उपाधिको लागि शनिवार सिड्नी सिक्सर्ससँग प्रतिस्पर्धा गर्ने छ ।

त्यसअघि क्वालिफायरमा सिक्सर्ससँग स्टार्स ४३ रनले पराजित हुँदै सिधैं फाइनलमा पुग्ने अवसर गुमाएको थियो । उता मेलबर्न फाइनलमा पुग्दा लेग स्पिनर सन्दीप नेपालमा छन् । सन्दीप आईसीसी विश्वकप लिग-२ अन्तर्गत ओमान र अमेरिकासँगको त्रिकोणात्मक एक दिवसिय सिरिजको लागि लिग पछि नेपाल आएका थिए ।