काठमाडौं (हाम्रो खेलकुद) – मध्यक्रमका ब्याट्सम्यान इयान होल्यान्डको अर्ध शतकमा आईसीसी विश्वकप लिग-२ त्रिकोणात्मक सिरिज अन्तर्गत दोस्रो खेलमा अमेरिकाले ओमानलाई २ सय १४ रनको लक्ष्य दिएको छ ।

टियू क्रिकेट मैदानमा टस हारेर ब्याटिङ गरेको अमेरिका ५० ओभरमा अल आउट हुँदै २ सय १३ रनमा समेटियो । अमेरिकाका लागि  इयन होल्यान्डले सर्वाधिक ६५ रनको योगदान दिए । ४२ औं ओभरको तेस्रो बलमा अकीब इलियासको बलमा ठूलो सट खेल्ने प्रयासमा बिट हुँदा बोल्ड आउट हुन पुगेका थिए । उनले ७८ बलमा ७ चौका प्रहार गरे । इयनको यो ओडीआई करिअरको पहिलो अर्ध शतक हो ।

१५.५ ओभरमा ५४-४ को कमजोर अवस्थामा रहेको अमेरिकालाई पाँचौ विकेटका लागि इयन होल्यान्ड र अक्षय होमराजले ८२ रनको महत्वपूर्ण साझेदारी गरेका थिए । कलीमुल्लाहले ३३ औं ओभरको पाँचौ बलमा अक्षयलाई ४४ रनमा बोल्ड आउट गर्दै उक्त साझेदारी तोडेका थिए । अक्षयले ५३ बलमा ३ चौका र २ छक्का प्रहार गरे ।

नवौं ओभरको दोस्रो बलमा मोहम्मद नदीमले ओपनर जेभियर मार्शललाई १३ रनमा एलबिडब्लू आउट गर्दै ओमानलाई पहिलो सफलता दिलाए । दशौं ओभरको दोस्रो बलमा बायाँ हाते तीब्र गतिका बलर बिलाल खानले अमेरिका प्रमुख ब्याट्सम्यान स्टिभ टेलरलाई ४ रनमा एलबिडब्लू आउट गरेपछि अमेरिकाले सुरुमै दबाबको सामना गर्नु परेको थियो । नदीमले १३ ओभरको अन्तिम बलमा ओपनर आरोन जोन्सलाई १२ रनमा बोल्ड आउट गर्दै अमेरिकालाई ४८-३ को कमजोर अवस्थामा पुर्याए ।

कप्तान जिशान मकसुदले १६ औं ओभरको पाँचौ बलमा मोनक पटेललाई फष्ट सिलिपमा रहेका अकीब इलियासबाट १९ रनमा क्याच आउट गराए । पटेलले २८ बलमा ३ चौका प्रहार गरे । जिशानलेनै ३४ औं ओभरको अन्तिम बलमा एल्मोर हचिन्सनलाई १ रनमा बोल्ड आउट गरे । करिमा गोर ६ रनमा बोल्ड आउट भए । तल्लोक्रममा तिमिल पटेल १६, कप्तान सौरभ नेत्रवलकार १४ र रस्टी थेरनले १० रनको योगदान दिए ।

ओमानका मोहम्मद नदीमले ८ ओभरमा ४३ रन खर्चेर ३ विकेट लिए । कप्तान जिशान मकसुदले १० ओभरमा १ मेडन सहित २९ रन खर्चेर २ विकेट लिए । बिलाल खान र अकीब इलियास २-२ विकेट लिए । कलीमुल्लाहको नाममा १ विकेट रह्यो ।