एजेन्सी – घरेलु टोली न्युजिल्यान्डले पहिलो एक दिवसिय खेलमा भारतलाई ४ विकेटले पराजित गरेको छ । भारतले प्रस्तुत गरेको ३ सय ४८ रनको विशाल लक्ष्य न्युजिल्यान्डले ४८.१ ओभरमा ६ विकेट गुमाउँदै पुरा गर्यो । न्युजिल्यान्डको जितमा अनुभवी ब्याट्सम्यान रस टेलरले १ सय ९ रनको शतकीय अविजित इनिङ खेले ।

टेलरको यो ओडीआई करिअरको २१ औं शतक हो । टेलरले ८४ बलमा १० चौका र ४ छक्का प्रहार गरे । न्युजिल्यान्डलाई ओपनर मार्टिन गुप्टिल र हेनरी निकोलसले १५.४ ओभरमा ८५ रनको साझेदारी गर्दै राम्रो सुरुवात दिलाएका थिए । गुप्टिललाई शार्दुल ठाकुरले केधार जादवबाट ३२ रनमा क्याच गराए ।

हेनरी निकोलस ८२ बलमा ११ चौका सहित ७८ रनमा रन आउट भए । कप्तान टम लेथमले ४८ बलमा ८ चौका र २ छक्का सहित ६९ रनमा क्याच आउट भए । चौथो विकेटका लागि लेथम र टेलरले १ सय ३८ रनको शतकीय साझेदारी गरेपछि न्युजिल्यान्डको जित सहज बनेको थियो । भारतका कुलदीप यादव २, शार्दुल ठाकुर र मोहम्मद शामीले १-१ विकेट लिए ।

त्यसअघि टस हारेर ब्याटिङ थालेको भारतले निर्धारित ५० ओभरमा ४ विकेट गुमाउँदै ३ सय ४७ रन बनाएको थियो । युवा ब्याट्सम्यान श्रेयस ऐरले १ सय ७ बलमा ११ चौका र १ छक्का सहित १ सय ३ रनको शतकीय इनिङ खेले । श्रेयरको यो ओडीआई करिअरको पहिलो शतक हो ।

लोकेश राहुल ६४ बलमा ६ छक्का र ३ चौका सहित ८८ रनमा अविजित रहे । पृथ्वी शा २०, मयंक अग्रवाल ३२, कप्तान विराट कोहली ५१ रनमा आउट भए । न्युजिल्यान्डका टिम साउथीले २, कोलिन डी गा्रन्डहोम र ईश सोधीले १-१ विकेट लिए । तीन ओडीआई सिरिज अन्तर्गत दोस्रो खेल शनिबार हुनेछ ।