काठमाडौं (हाम्रो खेलकुद) – नेपालले आईसीसी विश्वकप लिग(२ त्रिकोणात्मक सिरिज अन्तर्गत बुधबार ओमानविरुद्ध पहिला बलिङ गर्ने भएको छ । टीयू क्रिकेट मैदानमा भएको टसमा नेपालका कप्तान ज्ञानेन्द्र मल्लले टस जितेर पहिला बलिङ गर्ने निर्णय लिएका हुन् । यो सँगै टीयू मैदानले ओडीआई मान्यता पाएको छ ।

तीब्र गतिका बलर अभिनाश बोहरा र स्पिनर सुशन भारीले डेब्यू गरेका छन् । अभिनाश नेपालबाट ओडीआईमा डेब्यू क्याप लगाउने २० औं खेलाडी हुन् । योसँगै अभिनाश घरेलु मैदानमा ओडीआईमा डेब्यू गर्ने पहिलो खेलाडी बनेका छन् ।

गत वर्ष यूएईसँगको तीन टि ट्वान्टी सिरिजबाट नेपाली क्रिकेटमा डेब्यू गरेका अभिनाशले नेपालबाट १७ टि ट्वान्टी आई र १ लिष्ट ए खेलेका छन् । गत नोभेम्बरमा बंगलादेशमा भएको इमर्जिङ एक दिवसिय एसिया कपमा हङकङविरुद्ध लिष्ट ए मा डेब्यू गरेका थिए । उक्त खेलमा अभिनाशले ९ ओभरमा २ मेडन सहित ३२ रन खर्चेर ३ विकेट लिएका थिए । अभिनाशले तीब्र गतिका करण केसीलाई साथ दिने छन् ।

बायाँ हाते युवा स्पिनर सुशन भारीले पनि ओडीआईमा डेब्यू गरेका छन् । सुशनले २१ औं नेपालको ओडीआई क्याप लगाएका हुन् । बायाँ हाते स्पिनर भारीले नेपालबाट टि ट्वान्टी ६ आई र ४ लिष्ट ए खेलि सकेका छन् । नियमीत अनुभवी स्पिनर वसन्त टोलीमा नहुँदा सुशनले डेब्यू गरेका हुन् । सुशनले सन् २०१७ को अक्टोबरमा हङकङ विरुद्ध डेब्यू गरेका थिए ।

माघ पहिलो साता सम्पन्न मनमोहन मेमोरियल एक दिवसिय क्रिकेट प्रतियोगितामा सुशन सर्वोउत्कृष्ट बलर घोषित भएका थिए । उक्त प्रतियोगितामा सुसनले ४ खेलमा २९.४ ओभरमा ८५ रन खर्चेर १५ विकेट लिए । जसमा इनरुवा विरुद्ध ह्याट्रिक सहित ७ विकेट लिएका थिए । नेपालले ७ ब्याट्सम्यान र ४ प्रमुख बलर मैदान उतारेको छ । नेपालले कमल सिंह ऐरी, कुशल मल्ल र ललित नारायण राजवंशीलाई बेन्चमा राखेको छ ।

नेपालको प्लेइङ ११ :

ज्ञानेन्द्र मल्ल (कप्तान) , आरिफ शेख, दीपेन्द्र सिंह ऐरी, अभिनास बोहरा, विनोद भण्डारी (विकेटकिपर), करण केसी, पारस खड्का, रोहित कुमार पौडेल, सुशन भारी, शरद भेषावकर र सन्दीप लामिछाने

बेन्च :

कुशल मल्ल, ललित नारायण राजवंशी र कमल सिंह ऐरी