विनोद बाबु रिजाल, चितवन

राप्ती ¥यापिड्स नारायणगढको क्याम्पाचौरमा जारी चितवन प्रिमियर लिग (सिपिएल) को फाइनलमा पुगेको छ । लगातार तेस्रो जित निकाल्दै राप्ती फाइनलमा प्रवेश गरेको हो । मंगलबार राप्तीले इच्छाकामना वारियर्सलाई ५ विकेटले पराजित ग¥यो ।

इच्छाकामनाले दिएको १ सय ४९ रनको लक्ष्य राप्तीले ७ बल बाँकी रहँदै ५ विकेट गुमाएर पूरा ग¥यो ।
राप्तीको जितका भीम सार्की नायक बने । विष्फोटक ब्याटिङ गरेका सार्कीले ३६ बलमा ३ चौका र ४ छक्का प्रहार गर्दै ६१ रनको अर्धशतकीय पारी खेले ।

यस्तै साकार धरेलले ४९ बलमा ४ चौका प्रहार गर्दै ४३ रन बनाए । इच्छाकामनाका प्रशान्त आचार्यले २ तथा कप्तान दीपेश श्रेष्ठ, अमर सिंह रौटेला र दिवस आचार्यले समान १ विकेट लिए ।

त्यसअघि पहिलो ब्याटिङ गरेको इच्छाकामनाले निर्धारित २० ओभरमा ९ विकेट गुमाउँदै १ सय ४८ रन बनाएको थियो । टोलीका लागि गौतम केसीले ५३ रन बनाए । यस्तै सन्दीप सुनारले ३७ तथा प्रतीक श्रेष्ठले २४ रन बनाए ।

राप्तीका कमल थापाले ४ ओभरमा २९ रन खर्चिंदै ३ विकेट लिए । यस्तै कप्तान आकाश थापा र हरिबहादुर चौहानले समान २ विकेट लिए ।

सौराहाको इलिमिनेटर सम्भावना जीवितै

तेस्रो खेलमा जित हात पार्दै सौराहा स्याण्ड्सले सिपिएल इलिमिनेटर सम्भावना जीवितै राखेको छ । जारी प्रतियोगितामा खराब लयबाट गुज्रिएको सौराहाले मंगलबार राइट एण्ड एसोसिएट भरतपुर गुर्खाजलाई पराजित ग¥यो ।

गर वा मरको अवस्थामा रहेको सौराहाले भरतपुरविरुद्ध ६ विकेटको सम्माजनक जित हात पा¥यो । भरतपुरले दिएको १ सय २३ रनको लक्ष्य सौराहाले ४ विकेट गुमाएर पुरा ग¥यो । सौराहाको जितमा राजेश ढकालले उत्कृष्ट पारी खेले ।

४९ रन बनाएका राजेश अर्धशतक बनाउनबाट एक रनले चुके । उनले ५७ बलमा ३ चौका र एक छक्का प्रहार गरे । यस्तै कप्तान सन्तोष न्यौपानेले २७ बलमा ४ चौका प्रहार गर्दै ३८ रन बनाए । भरतपुरका रविन्द्रजंग शाहीले २ विकेट लिए ।

त्यसअघि पहिलो ब्याटिङ गरेको भरतपुर २ बल बाँकी हुँदा १ सय २२ रनमा अलआउट भएको थियो । भरतपुरका लागि रवीन्द्रजंग शाही र वीरेन्द्र शाहले समान २६ रन बनाए । अन्य ब्याट्सम्यान चल्न सकेनन् । सौराहाका अनुज चनरा र राजेश लम्सालले समान ३ विकेट लिए । खेलको म्यान अफ दी म्याच सौराहाका राजेश ढकाल घोषित भए ।

प्रतियोगिताअन्तर्गत बुधबार पनि २ खेल हुनेछन् । बुधबार पहिलो खेलमा माडी टाइगर्स र राप्ती ¥यापिड्स तथा दोस्रो खेलमा इच्छाकामना वारियर्स र सौराहा स्याण्ड्स भिड्नेछन् । इलिमिनेटर पुग्ने चारै टोलीको सम्भावना उत्तिकै रहेकोले बुधबारको खेल निर्णायक हुनेछ । प्रतियोगिताको विजेताले उपाधिसहित २ लाख र दोस्रो हुने टोलीले १ लाख रुपैयाँ प्राप्त गर्नेछ ।